Resulta inevitable falar güei del comunicáu realizáu por ETA na tarde d'ayeri 20 d'Outubre, son muitas las opiniones ascuitadas sobre eillo, cadún tien la súa y todas son respetables, pero llamentablemente hai dalgunas que non sólo cadecen d'una falta desaxerada d'optimismu sinon que tentan de mazcarar un feitu claru a los güeyos de cualesquiera que siguiera con una mínima atención los pasos andáos dende va deillos meses: ETA yá ye hestoria.
Interesante análisis faía na tarde d'ayeri Ignacio Escolar al respeuto na canal 24 horas de Televisión Española desplicando'l fracasu de la banda armada, porque la realidá ye que 829 muertos depuéis la lluita d'ETA nun sirvíu pa nada, asitiándola na mesma situación na que s'allugaba trenta y cinco años atrás. Con una cadarma formada por efectivos cada vez más xóvenes ya inespertos, ensin solvencia económica dala, afogada pola policía y con tódala sociedá, esquierda abertzale incluída, condergando la súa violencia, el cercanu cabu del camín de las armas yera cada vez más nidiu. La veracidá d'esti final ta garantizada amás por outras muitas rezones cumo foron por parte de los etarras l'altu al fueu permanente, retirada del impuestu revolucionariu ou'l desaniciu d'Ekin, pasos qu'evidentemente nun se dan pa llueu volver a las armas, ou la conferencia de paz celebrada en Donosti respaldada por presonalidaes tan reputadas cumo Jimmy Carter, Kofi Annan ou Bertie Ahern. Tódol mundu sabe qu'esta vez ye verdá, qu'esta vez ye la definitiva, la sociedá vasca, los partidos políticos y cumo dixi antias cualesquiera que siguiera con atención estos sucesos, los réditos políticos que chegarán gracias a eillo, triste ou felizmente, son outra hestoria que nun debe torgar l'euforia xenerada pola noticia d'ayeri.
Outramiente, las reacciones del nacionalismu español, incapaz de lleer ente llinias y más afanáu na venganza que na paz, tamién foron yá asoleyadas, sacando conclusiones absurdas cumo qu'ETA condicionaba'l sou fin a una negociación conos estaos español y francés, cuando la única negociación malapenas amentada foi la referente a las consecuencias del conflictu, entendamos aquello cumo entrega d'armas y averamientu de presos, ou qu'ETA ye quien se lleva la victoria tres todu esti llargu procesu, ridículu, el fracasu d'ETA ye tan evidente cumo'l sou fin. Lo peor nun ye que nun crean no comunicáu, lo peor ye que desearán tar no cierto.
Pa cabu, nun debemos esqueicer a las víctimas y el sou inimaxinable sufrimientu, nunca, pero las vinientes xeneraciones sabrán d'ETA cumo la mía soupo del GRAPO, al traviés de llibros ou narraciones de los nuesos padres, sólo por eillo, hemos tar satisfeitos
0 comentarios:
Publicar un comentario en la entrada