¿PODEMOS? Sí pero...

Si aquella espresión del votu útil en dalguna ocasión tuvo dalgún aquel, nun cuido que fuera nun momentu más axeitáu que'l que vivimos anguaño. Aportéi la mia robra pal nacimientu de PODEMOS, confiéi nellos nas europeas y seique faréi lo mesmo outra vuelta nas xenerales. Nun estói ciegu nin soi un inorante, y nun pongo la mano no fuegu por tódalas suas mididas, sicasí, creo qu'esta formación política ye la única alternativa de cambiu real de todas aquellas que tienen posibilidá d'asganzar un resultáu granible. PODEMOS supón, en definitiva, esi terremotu del que precisa esti estáu pa que las cousas polo menos cambien, quiciabes pa pior, nun vos sei dicir, ye lo que tien lo desconocido, pero lo outro ya sabemos lo que ye y lo que nos aportóu y aporta.

Outramiente, nun puedo tapecer la mia decepción énte'l nulu interés dedicáu dica güei por parte d'esti partidu a nivel local en cuantias a la xusta y trentañeira reivindicación del nuesu puebru de contar con una autonomía propia, todo ello mentanto llevan a cabu'l sou discursu falando ensin nengún pudor de Castilla y León, castellanos y leoneses, nuestra comunidad, etc., un feitu qu'imaxino pagarán en mayor ou menor midida, polo menos en Llión, a la hora d'arrecadar votos. Si dende'l primer momentu PODEMOS daba la impresión de querer romper con todo, pámeque polo menos nesta estaya vai siguir el mesmu carreiru que vien siguiendo dende cuantayá cuasimente toda la esquierda local (escepciones hailas) d'aceptar l'actual marcu autonómicu y xustificar aquello col ermu argumentu de que dibuxar una raya más no mapa nun vai arregrar nengún de los verdadeiros problemas que la sociedá sufre güei.

Lo de la esquierda y el llionesismu ye dignu d'un análisis aparte. Ésta siempre etiquetóu al outru cumo rede clientelar burguesa de dreitas (en parte rezón nun-yes falta), pero metiendo nesi sacu a todu aquel, fuera de la sensibilidá ideolóxica que fuera, pal que'l reconocimientu de la esistencia d'un puebru llionés con dreitu a tomar las suas propias decisiones supuxera una prioridá. Esta coxuntura tan difícil d'estorgar ye la que vienen sufriendo nos últimos diez años las poucas iniciativas llionesistas d'esquierda, todas ellas nel ámbitu del asociacionismu, y qu'amodín van superando cumo buenamente pueden pa poder participar d'esi pactu tácitu de camaradería qu'alita nesa gran corriente y que se consagra en mui bien d'actos y manifestaciones, onde diferentes formaciones d'esquierda son a xunise a la hora de defender un oxetivu común a todas.

La sociedá en xeneral nun tien un conceptu muito meyor d'esi llionesismu qu'inevitablemente asocian de maneira directa a UPL, cousa qu'esprica la chamadeira situación de que la mayor parte de los llioneses estean a favor d'una autonomía propia mas nun depositen la sua confianza nesti partidu. La golosina de l'autonomía p'arréu facer la misma política, ou on pior, que PP ou PSOE ya va muitu tiempu que nun engaña a nadie y vai facer falta muito más qu'eso p'acabar con esi arume a caronxu qu'arreciende d'un avieyáu portal de la capitalina Avenida República Argentina. Dientro de malpenas seis meses, cuando l'enfermu sía finalmente un cadabre, puede que la xusta reivindicación llionesa cueya aire nuevu, entre nesa nueva política de participación y proyectu y remueva abondu polvu cumo p'aspirar a una nueva oportunidá, ou puede que participen d'ella partidos qu'antias nun lo ficieron, por soñar que nun quede. Hasta entós, y masque insisto no dito no primer párrafu, siguiréi ensin acudir cumo hasta güei a nenguna asemblea de PODEMOS León, porque no fondu sei que si voi... numás sirvirá pa poneme de mui mala data.