26/5/15

La gran sorpresa electoral


Pa min nun foi PODEMOS, nin C's, nin Colau, nin Carmena. La gran sorpresa ensin nengún xéneru de duda foi'l feitu de qu'UPL llograra conservar el procurador que ya tenía en Valladolid y que tovía siga viva nel Ayuntamientu de Llión d'au nun queda fuera por un cientu votos. Y siendo francu y masque respeto la voluntá de la xente... debo dicir qu'esta sorpresa nun ye dalgo que m'allegre.

Si'l llionesismu políticu on güei tien dalguna posibilidá real de debrucar una situación cada vez más difícil pal nuesu puebru, nun creo que sía a traviés d'unas siglas que ya nun atraen a naide quitante los cuatro cansones que tovía pueden permitise vivir d'ellas a traviés d'una ufierta tebia, rancia y carente dafeitu tanto d'un proyectu seriu de país cumo d'una conocencia mínima de lo que ye esi país. Pa la mayor parte de la sociedá, UPL sigue siendo güei la única cara que tien el llionesismu, cuestión que non sólo nun supón una alternativa digna pa esos cuántos qu'anguaño nun tienen crara la sua posición política... sinon que decepciona, desilusiona y baixa la moral a los poucos que tovía confían na posibilidá de llevar a cabu un procesu de construcción nacional pal País Llionés. 

Cumo yera d'asperar, malpenas venticuatro horas tardóu Sendino tres el recuentu electoral n'echar la llingua a pacer y facer pública la sua disposición a qu'UPL sía quien dea a Juan Vicente Herrera la mayoría que precisa pa ser nomáu outra vuelta presidente de la Xunta de Castiella y Llión, todo a cambiu de tres conseyerías pa la provincia de Llión, ayudas pal aeropuertu, recuperar Torneros, sofitar el parque tecnolóxicu y entainar en sacar alantre'l tramu de l'autovía Llión-Valladolid que chegaría hasta Santas Martas.

Nun deixa de tener gracia que'l que pidía a los llioneses que votaran cono corazón a la única fuercia que defiende la nuesa tierra y que nun está supeditada a las decisiones de Valladolid y Madrid, tenga precisamente tan pouco corazón (y cabeza) cumo pa traicionar a los sous cada vez menos votantes pactando agora conos principales responsables tanto d'esas decisiones cumo de la nuesa situación actual, maniobra pouco rezonable que deixa en carnicas el verdadeiru afán d'UPL: formar parte de dalgún gobiernu, el que sía y cumo sía, enantes de qu'en cuatro años ya nun cheguen nin a esi 5% cono que milagrosamente salvoron los muebles nesta cita electoral. Precisamente los últimos quince días d'actividá no twitter d'UPL basóronse n'alternar unos tweets usando cumo principal argumentu pa pidir el votu l'ataque y la crítica a aquellos conos qu'agora se quier pactar, xunto con outros tweets nos que se publicaban fotos d'unas unas supuestas visitas diarias a mui bien de llugares del país, tamién de Zamora y Salamanca (que supuestamente UPL defiende cumo llionesas). Ye mui triste y vergonzosu que las condiciones que pide Sendino pa un pactu cono PP a nivel autonómicu nun menten pa nada a estas dúas provincias. Esa ye la meyor prueba del sou llionesismu y de que trenta años depuéis tovía sigue habiendo llioneses de primeira y de segunda.

Acabo ya, porque de la nada sorprendente omisión entre esas condiciones de desixir el cumprimientu del artículu 5.2 acerca de la defensa y promoción de la llingua llionesa... paso hasta de falar, no fondu todos sabemos que la nuesa llingua ye la menor remolición d'UPL xunto con Zamora y Salamanca.

11/5/15

Venti segundos no viaductu


Un cientu veces quedesti no retrovisor y sicasí, nunca nun quixi facer parada, nin caleyate, nin moyar los deos nas llágrimas que te cogüelman, na llenta escravina vestida pola rouca qu'ayeri resollaba ecos de sacrificiu, rutina, coraxe, inocencia.

Quiero cruzar a escape, ensin mirate, fuxir, pero los llazos d'una infancia arrapuzando'l verde qu'anguaño ye esmorecidu azul no qu'afogase nun deixan de tirar de min... y miro. Lluenxe, acolumbro la esguilosa güelga d'un crucero polos fiordos de la vergüenza, d'un domingu de risas y hule de cuadros, de güeyos bien abiertos, d'almiración, de flashes de turista; réditu de manufacturada naturaleza que nun llogra esterredar escuros murmurios d'un crime, nin engrasar rinchantes grayidos, nin amatar l'ecu xordu los güelpes, nin frenar eternos saltos al vacíu, nin malcumprir cicateiras promesas.

Ferida abierta que nun sanará, fermosa poma podre na que numás el simplayu finca'l diente, mal llembranza entafarrada con lladriyu, empedriáu y náutica hipocresía... outra vuelta quedesti no retrovisor.

Cuando salí de Riaño
llorando volví la cara,
adiós mi pueblo y mi valle
que se quedan bajo el agua...

7/5/15

10 años cumpre "El Llumbreiru"...

...y dalgunu más lleva Furmientu, l'asociación que lu asoleya trimestralmente trabayando pola visibilidá  y recuperación del llionés na provincia de Zamora.



L'interés por un idioma nuna situación tan difícil cumo la del llionés, xurde na mayor parte de los casos por un fondu amor pola tierra y la cultura propia, un amor que davezu puede vese tristemente emporcáu por dalguna suerte de xovinismu que lleva a entender la llingua cumo un calce pa outras cousas en llugar d'un fin en sí mesmu. Nun son precisamente poucas las muestras que podemos arrecadar d'aquello, mui especialmente nesti eiru d'Internet, au abonda l'usu d'un llionés faltu de rigor y chenu d'artificiales hiperdiferencialismos qu'escapan de la realidá oral y viva y que cumo muito sirven p'alimentar la pantasía na que mora aquel que los emprea, pantasía n'onde esi virtual modelu de llingua ye una reliquia única y diferente dafeitu a tódolos idiomas que s'alcuentran na contorna d'un superimperiu racial y galácticu. En fin, una ridícula mentalidá que lo único qu'espeya ye la galbana y la falta d'interés d'unos cuantos por conocer la realidá de la nuesa llingua y facer dalgo daveras curioso porque nun se pierda. Lo peligroso d'esto ye la cantidá de xente bienintencionada, con arrancaderas y ganas por deprender llionés que por desconocimientu puede chegar a entender a esta xentiquina cumo'l sou referente ou guía pa facelo.

Esta parolada prántola precisamente pa entender la filosofía de Furmientu y lo que tien feito a lo llargo de todos estos años, que ye todo lo contrario. Dende la sua nacencia dica güei y fuxendo de dobres intenciones, banderines y patrioterismos, realizoron un rigurosu llabor por conocer la realidá oral de las variedades del nuesu idioma na provincia de Zamora y torgar el sou desaniciu. Entre las muitas actividades que vienen llevando a cabu, n'onde El Llumbreiru ye outra de tantas, nun faltoron concursos de recoyida de vocabulariu y toponimia tradicional, xornadas divulgativas, charlas, esposiciones ou propuestas a ayuntamientos pal usu y recuperación de la toponimia tradicional. La sua revista, que cumpre agora diez años, ye la meyor muestra del sou llabor y nella puntualmente podemos conocer toda l'actualidá del procesu de recuperación y dignificación del llionés, asina cumo atopar mui bien de muestras, a través de traducciones, poemas ou rellatos, del llionés qu'inda güei pervive en Zamora ou interesantes artículos acerca d'él. Precisamente y por casu, nesti postrer númaru (el cuarenta concretamente) podemos ller un interesantísimu artículu acerca de las diferentes formas de conxugación del verbu ser en cuantas al llugar n'onde se dean, dalgo bien prestoso p'aquellos más interesaos na llingua que nas pancartas y las bandeiras.

Confío en que despuéis d'esti númaru cheguen polo menos outros cuarenta más, Furmientu fai falta y muito tanto en Zamora cumo en todu'l dominiu llingüísticu.

La mia norabona más sincera.

Related Posts Plugin for WordPress, Blogger...