10/3/15

Los clásicos nunca nun cambian: UPL y el llionés

Durgante siete años fui afiliáu a UPL. Si muitas foron las decepciones que sufrí cuasimente a diariu por militar nun partidu con un proyectu ermu, onde'l desconocimientu a tódolos niveles de lo que yera esi País Llionés que se pretendía defender rescamplaba cumo una mosca nel azucre y au había una mayor preocupación por demostrar la españolidá del partidu que'l sou llionesismu, especial atención amerita'l tratu que recibía la llingua llionesa y el sou usu no senu d'esta formación política.

Bien poucos yéramos los que facíamos usu del llionés davezu n'UPL, feitu pol que na propia sede del partidu y por parte de los propios afiliaos, recibíamos no meyor de los casos miradas que facían que nos sintieramos cumo auténticos marcianos, siendo muitas las ocasiones nas que por presentar no comité executivu una propuesta ou un proyectu usando'l llionés cumo llingua vehicular, las palabras más amables qu'escuitábamos yeran del xeitu a ¿Pero vosotros qué queréis, que se rían de nosotros?.

Quitante la escepción de la Conceyalía de Cultura Llionesa, gobernada por UPL entre los años 2007 y 2011, caracterizada por una política llingüistica na que nun faltóu muita polémica pola falta de rigor y la politización de la llingua, que se llevóu a cabu pola personalísima decisión del conceyal del momentu y cona total desaprobación del partidu, UPL enxamás nun llevóu a cabu nenguna iniciativa daveras seria nin fizo nengún xestu pol nuesu idioma. Nin la sua web, nin nenguna propaganda electoral ou documentu internu foi emitidu en llionés, la nuesa llingua yera vista básicamente cumo un inventu de cuatro abertzales que numás sirvía pa palmar votos.

Todu esti puñáu de cousas, sumando amás el feitu de que las políticas d''UPL siempre foron l'unicu referente d'esi supuestu llionesismu, sirvieron pa que finalmente me decatara que si ser llionesista yera siguir las regras d'esi partidu, you evidentemente nun lo yera, asina que finalmente marchéi a escape ensin mirar atrás.

La cousa de qu'UPL pase del llionés cumo you del tenis, en realidá nun ye tan grave mentanto tal comportamientu espeye la opinión mayoritaria de los sous afiliaos (que vamos, menudos llionesistas...), pero lo que ya ye inaceptable ye que protesten porque outros deixen de facer lo qu'ellos mesmos nun facen. Anueite, naufragando por twitter, y acerca d'esta noticia publicada por Leonoticias, atopo esto:


Francamente, abultóume tan indignante ller aquello que nun pudi callar, contestando al tweet en cuestión que l'interes de la Junta y el d'UPL pol idioma yera idénticu, y que nun me parecía afayadizu recriminar nada a la Junta cuando la propia UPL nun tenía nin la sua web en llionés, vamos, qu'están cumo pa pretender dar exemplu a naide. La respuesta que recibí, na que nun se me mentóu (nun sei si pa evitar que la llera) foi xusto la qu'asperaba recibir y que muestra a la perfección el conceptu que tien esti partidu políticu de lo que ye'l llionés y la maneira de proceder pa la sua defensa:


Primeiro protestamos polo que nun facen outros pero nós tampouco, arréu facémonos los socos cuando nos lo dicen y finalmente pidimos al que nos lo diz que lo faga por nosoutros, vamos, pa plasmar.

Si UPL nun tien nin la voluntá de facer dalgo tan básicu y fundamental cumo dar un mínimu de visibilidá al idioma publicando una versión de la sua web en llionés y amás xustificando aquello con un argumentu tan gañán cumo que nuestra web no sólo es para que la vean en el País Leonés, ya queda craru enforma'l sou conceptu folclorista y reduccionista del idioma, únicamente válidu pa falar de carros y madreñas y ensin salir de la provincia, pero qu'amás tengan las arrancadeiras de querer salir del pasu pidiéndome a min que dea un cursu na sede, cumo dando a entender que d'ello dependiera'l mieu compromisu cono llionés mentanto ellos siguen ensin facer gota, ya ye la monda, asina que, de mui mala data, informéi-yes d'unas cuantas cousas. 


La situación del llionés cumo realidá viva ye d'estrema gravedá, prácticamente terminal. La sua defensa y sobrevivencia ye responsabilidá de todos y nesta xeira tan difícil naide sobra, pero lo qu'está demás son los brindis al sol y posicionase de maneira tebia a favor del idioma nas redes sociales a dous meses de las elecciones, pa que tres el recuentu de votos (que vai ser la risión) la cousa quede outra vuelta pa prau.

Si UPL está daveras a favor del llionés, que trabaye por él con craridá y seriedá, con feitos y demostrando activamente'l sou compromisu. Los brindis meyor nas bodas.
Related Posts Plugin for WordPress, Blogger...