21/5/16

Acabóu la segunda edición del cursu de ḷḷionés de Faceira

Un instante de la postrer clas del II cursu de ḷḷionés de Faceira na ciudá de Ḷḷión
Foi la segunda edición, mas pagóu la pena tanto cumo la primera. Outra vuelta foi una ventena de personas la que quixo con honestidá, interés, rixu ya compromisu, achegase conocer esi tesouru chamáu ḷḷingua ḷḷionesa ya dar los primeiros pasos neḷḷa a traviés del segundu cursu organizáu pola nuesa asociación.

Esta vez foi especial por deḷḷos motivos: amás de trabachar al igual que l'anu pasáu cona guía gramatical Xurdir, videos, audios ou los testos de diversos escritores de prestixu cumo Xosepe Vega, Roberto González-Quevedo ou sua madre, Eva González; estrenábamos el nuesu manual prácticu Falar con Xeitu ya contábamos con interesantísimas coḷḷaboraciones que fixenon el cursu muito más prestosu, dándo-ḷḷy una dimensión a traviés de la cuala, los alumnos pudienon deprender mui bien de cuestiones que diban acuḷḷá d'aspectos puramente gramaticales.

Portada del manual prácticu d'iniciación al ḷḷionés Falar con Xeitu
Ya asina, nos sous respectivos días, pasanon pol aula diversos miembros de Faceira pa compartir con nós cuestiones de la nuesa historia, cultura ou ḷḷingua dientro de los sous eiros de conocimientu: l'historiador Ricardo Chao falóu del Reinu de Ḷḷión, Alex Díez fixo un respasu a la nuesa toponimia autóctona, Iván Martínez Lobo esplicaba la tradición de las mazcaradas d'enviernu en Cabreira ya Nicolás Bartolomé Pérez analizóu toda la evolución de la ḷḷiteratura en ḷḷionés dende los sous nicios dica güei.

Nicolás Bartolomé Pérez falando de ḷḷiteratura no segundu cursu de ḷḷionés de Faceira
Pouco más puedo faer que dar las gracias de corazón a todos eḷḷos pol sou compromisu ya implicación nesti prestosu ḷḷabor d'averar el ḷḷionés a todu aquel que quiera deprendelu, ya cumo non, gracias sobremanera a tódolos alumnos qu'asistienon ya que son de fincia los que fixenon posible la realización del cursu ya qu'estos seis meses, nos qu'outra vuelta deprendí tanto ou más qu'eḷḷos, fueran un auténticu placer ya una esperiencia fondamente arriquecedora.

Yá queda menos pa la tercer edición.
Related Posts Plugin for WordPress, Blogger...