13/10/17

IV Cursu d'Iniciación a la Llengua Llionesa de l'Asociación Faceira



La nuesa asociación, cumpriendo cono sou compromisu cona defensa y promoción de la llengua y cultura llionesas, y ante l’exitu de los cursos llevaos a cabu los pasaos años, organiza’l sou cuartu cursu d’iniciación al nuesu idioma en modu presencial que vai tener llugar na ciudá de Llión, concretamente nas aulas de la consultoría de formación Skala, asitiada na calle Jorge de Montemayor, 6.

El cursu tendrá una duración total de 40 horas lectivas que s’impartirán cada vienres ente las 17,00 y las 19,00 horas, dende’l 3 de noviembre del presente añu hasta’l 6 d’abril de 2018. Las crases contarán cumo base de trabayu cona guía gramatical de llionés Xurdir y el manual prácticu d’iniciación Falar con Xeitu, editaos entrambos los dous pola nuesa asociación, amás d’outros materiales didácticos que serán entregaos a cada alumnu dientro’l preciu de matrícula. Xunto al aspectu concretamente lingüísticu, el cursu abordará tamién outras cuestiones cumo la literatura, historia, toponimia ou cultura tradicional llionesa, eiros au la nuesa llengua siempre xugóu un papel fundamental.

Tódolos interesaos en matriculase pueden facelo en Skala Formación, calle Jorge de Montemayor, 6. El prazu de matrícula remata’l próximu 31 d’outubre y el preciu de la mesma ye de numás un pagu únicu de 40 €. Las prazas son limitadas. Pa más información contactar na nuesa dirección de corréu asociacionfaceira@gmail.com

Llugar: Skala Formación, calle Jorge de Montemayor, 6.

Crases: Los vienres de 17,00 a 19,00 horas dende’l 3 de noviembre de 2017 hasta’l 6 d’abril de 2018.

Horas lectivas: 40.

Preciu: 40€ (pagu únicu)

Prazu d’inscripción: Hasta’l próximu 31 d’outubre.

23/8/17

Cuando queima una parte de ti


Esti post debería falar de Cabreira sí, pero de la deliciosa visita que fici'l pasáu fin de sumana con motivu de la II Feria del Llibru Cabreirés y el fitu históricu que supuxo la presentación d'Esbardu, vocabulariu llionés ilustráu, última publicación de Faceira. Sicasí, llamentablemente hai que falar de Cabreira al respective del infiernu qu'está a vivise na comarca estos días.

Dicía Sabina nún de los sous cantares que nun hai pior señardá que la d'echar en falta aqueillo que ñunca nun se vivíu. La primer vez que piséi Cabreira, que plasméi conos sous fermosos montes y qu'escuitéi la llengua que supón la gran pasión de la mia vida en boca de los sous paisanos, recordéi de sopetón y al detalle todos y cadagunu de los momentos qu'a lo llargo de la mia infancia debí vivír allá y en realidá ñunca nun viví, y nesi mesmu intre decatéime de que yera esa comarca a la que you pertenecía masque nun ñaciera neilla.

El pasáu sábadu precisamente comentaba en Trueitas na mia intervención na feria'l llibru, que los llazos que me xuntan a esa tierra nun son familiares nin de sangre, sinon aqueillos que xurden con ñaturalidá en cualisquier ser humanu que mira'l verdor d'esta comarca conos güeyos del corazón, llazos que pueden chegar a ser aínda más fuertes que los primeiros.

El fuegu intencionáu que nestos días fiere la comarca, y qu'una vuelta más deixa albentestate la incapacidá de reacción de las autoridades que nesta oucasión tardoron hasta doce horas en chegare tres los primeiros avisos, nun arde con más fuercia que la pasión que los que l'amamos sentimos por eilla. Numás queda aguardar porque la situación pueda finalmente controlase y tentar de compensar esta calamidá cono mayor rixu a la hora de dar cono delicuente responsable d'estos feitos. Debe pagar por eillo. Cuestión aparte y qu'ameritaría toda una entrada son las consecuencias de la falta d'autogobiernu y descentralización que sufrimos tódolos llioneses nesta comunidá autónoma, y qu'en situaciones clave cumo la capacidá de respuesta ante sucesos cumo esti, muestran la sua cara más cruda, angustiosa, frustrante y horrible.

Un abrazu enorme a tódolos cabreireses qu'están a pasar por esta pesadiella. Nin la llocura, nin la maldá, nin los intereses económicos qu'en muei bien de casos s'escuenden tres estos atentaos podrán enxamás pesar más que'l coraxe de las ñuesas comarcas y los sous paisanos.
Related Posts Plugin for WordPress, Blogger...