2/12/11

Quéixate pola desprotección del llionés

L'asociación Faceira ta acabante de publicar na sua páxina web una interesante niciativa na que tódolos amantes del llionés podemos collaborar fácilmente y aportar el nuesu arimu no llabor de recuperación de la llingua llionesa. Trátase de que cadún de nós unvíe al procurador del común, al traviés de los diferentes calces disponibles, una queixa énte l'actu d'inorancia que la Xunta de Castiella y Llión fai del artículu 5.2 del sou propiu estatutu d'autonomía, el cualu detalla dende la reforma realizada en 2007 que El llionés será oxetu de protección específica polas instituciones pol sou particular valor drento del patrimoniu llingüísticu de la Comunidá. La sua protección, usu y promoción serán oxetu de regulación. Cuatro años depuéis de ser asoleyáu l'amentáu artículu on nun se tomóu midida dala al respeuto.

Los detalles en Faceira.org.

29/11/11

Prostitución periodística y llingua llionesa

Na mañana d'ayeri, dous años depuéis, los ciudadanos de Llión espertábamos col nuesu idioma autóctonu cumo protagonista de la portada del Diario de León. Nesta ocasión y tres superase nazismos y llionpedias, el decanu de la prensa llionesa garra d'esmenu un sorprendente interés pola n'apariencia elevada inversión que na anterior llexislatura l'equipu de gobiernu realizara a la hora d'impartir cursos de llingua p'adultos y escolines.

Quienquiera que me conoza medianamente, sabe de mano la falta de confianza que tengo en tódala prensa española y el mieu escepticismu a la hora de lleer titulares sensacionalistas y grandes escándalos que de sópitu cogüelman rotativos y mazcaran cuasi siempres outros afanes, sía quiciabes porque you mesmu los sufrí y en primer presona tastiéi las medias verdaes qu'el periodismu puede chegar a asoleyar cuando los intereses perticulares tienen más pesu que la pura información, pero en fin, vamos a la ensundia del asuntu.

La noticia, roblada por Miguel Ángel Zamora y basada nunos datos que de xuru filtrara'l gabinete de prensa del Partido Popular del Ayuntamientu de Llión col envís de xustificar la esclusiva ausencia del llionés dientro de la oferta de cultura tradicional del consistoriu y ansí afrontar las queixas por parte del alumnáu, informa tendenciosamente de las retribuciones recibidas pola figura del coordinador de cultura tradicional y de los cuatro monitores qu'afalaban los cursos, cantidaes que na sua totalidá suman en cuatro años según fuentes del periódicu  417000 €, cifra nada despreciable y que mui probablemente escandalizaría a cualesquiera presona pa la que la llingua llionesa nun suponga un elementu de prioridá nos difíciles tiempos que cuerren... ou tal vez non tanto si afondamos un pouco na cuestión:

El coordinador de cultura tradicional, con una soldada idéntica a la que cobran tódolos coordinadores de las diferentes áreas del ayuntamientu, tien la función cumo'l sou propiu nome indica de planificar, estructurar y supervisar la realización de tódalas actividaes venceyadas a cultura tradicional nas que'l llionés nun supón nin una décima parte, feitu pol que nun entiendo, acullá d'un interés d'anantar la cifra un pouco a la desesperada, la presencia de la sua figura nesta noticia, pero a parte d'eillo, si garramos las retribuciones de los cuatro monitores, de los cualos tres tan adscritos dende cuantayá a la conceyalía de bientar social y nun foron contrataos específicamente pa impartir llionés sinon pa sofitu escolar, podemos comprebar fayendo la correspondiente división cumo'l sueldu malapenas supón unos 1000 € mensuales. Vamos, que sólo un monitor foi contratáu esclusivamente pa dar esas clases y el sou salariu suponían 20000 € brutos añales, los cualos, multiplicaos por cuatro años de llexislatura dan en realidá 80000 €, cantidá mui pero que mui llonxana de los 417000 € con que l'Ayuntamientu de Llión tenta de llavar la manos na abegosa xeira d'acabar con dalgo tan afitáu na conceyalía de cultura llionesa cumo yera la nuesa llingua. Outramiente, cumo bien indica la noticia, yá sólo quedan dous monitores dedicaos a impartir las clases de cultura llionesa en colexos, y encalco lo de cultura porque yá decidioron l'añu pasáu de maneira dafeitu unillateral deprender únicamente cultura a los rapaces y retirar llingua.

N'entradas anteriores yá faléi del evidente oxetivu del nuevu equipu de gobiernu de desaniciar la llingua llionesa del ayuntamientu, agora, garantizando inversiones en publicidá y la soscripción del consistoriu al Diario de León, utilizan al mesmu con comunicaos prerredactaos vestidos de noticias pa xustificar cumo nesti casu la súa política dictada dende la ciudá del Pisuerga. En realidá nun sei quéi ye peor, si la falta d'honestidá del PP desenvolviendo dafurto las suas mididas acordias a los sous oxetivos reales ou que'l periódicu que nun va muito publicitaba y falaba d'actividaes rellacionadas cona nuesa llingua, cultura y feitu diferencial, tenga que poner la sua llinia editorial a los pías de los que gobiernan p'afrontar la crisis. Güei, publicaban outra nueva na qu'amentaban que mui probablemente las clases serían esternalizadas ya impartidas por una asociación, lo que supón que con suerte, de volver, el llionés volverá tarde y en segundu
planu, pola mor de la escasa esperiencia y carácter del actual conceyal de cultura llionesa, l'avulense Juan Pablo García Valadés p'ansí amatar ou tentar d'amatar la polémica, y cuido que será de la mano de metodoloxías más al serviciu d'outras cousas que de la recuperación d'un idioma al que-ye quedarán al pasu que vamos unos venti años de vida, tornando a un error cometidu no pasáu que pouco a pouco diba aviándose no Palaciu Don Gutierre.

Vivimos tiempos oscuros, eso es innegable. Harry Potter y las reliquias de la muerte, de J. K. Rowling.

Salú,

16/11/11

2ª Bardoniana

Veleiquí'l cartel  col programa de la 2ª Bardoniana que nesta ocasión entama la recién creada Asociación Cultural Faceira y tendrá llugar na Casa de Cultura de Carrizu de la Ribera'l próximu sábadu, 26 de Noviembre. Esta vez la temática paez tar más empobinada p'hacia la música y tradición oral ensin que falte una mesa redonda y una llectura de poemas cona llingua llionesa cumo protagonista, you asistiréi, si pasáis verémonos.


7/11/11

14 versos d'agradecimientu

Cuando más sabor a escarmu tien la vida
y los grises días faen de min borrayu
nun hai augua, llume, ungüentu ou mes de mayu
pa sanar meyor que tú las mias feridas.

Si me pierdo xordu y ciegu ensin salida
de campana d'esperanza sos badayu,
sos encontu, sos de lluz clisante rayu
p'allumar esta esistencia desvalida.

Quiera'l cielu que nun faltes enxamás
pueis la vida alita en min pol tou calor
y ensin ti nun sirve tódolo demás.

Qu'estos versos agradezan el valor
que tresmites hacia min, que tú me das
pa que lluite cumo tú pol nuesu amor.

1/11/11

Cuando t'obligan a vivir por cima de las tuas posibilidaes

Tresdantanueite parolaba con dous amigos tomando dalgo sobre deillas cuestiones ya irremediablemente surdíu la política, esa de la que sólo quiero escapar y sicasí tengo neillo más ou menos el mesmu éxitu que'l que tendría si tentara d'afuxir de la mia solombra. Políticos, paru, indignaos, 15M, crisis... trending topics típicos de las conversaciones d'anguaño de los que llamentablemente tanto tardaremos en desprendenos.  Lo que me preocupóu foi esi mensaxe que yá definitivamente vei cuayando ente la población y que tuvi que sentir outra vuelta más ente tragu y tragu: la culpa es nuestra, por vivir por encima de nuestras posibilidades durante tantos años.

Los mieus collacios de xoldra, esbardiaban sobre la inconsciencia de la sociedá al  querer conducir coches d'alta gama y mercar casas de douscientos metros cuadraos, siete habitaciones y dous baños gastando dineiru del futuru cuando en realidá nun había perras nin pa una tienda de campaña y un monopatín. Vamos, que s'encontaban un pouco nos argumentos del famosu videu d'Españistán que yá todos conecemos. Dicían tamién qu'hai que tener más xacíu y que lo normal ye faer un análisis de la situación real na que t'alcuentras y según ta la cousa, en llugar de lo anterior, lo lóxico sería mercar una casa de trenta metros cuadraos con dúas habitaciones y un bañu, reflexión mui espardida tamién. De lo que la xente paez que nun se decata ye de que lo verdadeiramente lóxico sería que pol preciu que pagamos por esi pisu de trenta metros cuadraos deberíamos poder mercar la mansión del príncipe de Bel-Air.  Nun podemos aceptar esi argumentu, aspirar a una morada digna nunca nun debe ser consideráo cumo querer vivir por cima de las nuesas posibilidaes. Nunca.

El preciu de la vivienda, dende que tengo usu de razón, nos meyores casos triplicóuse y el suañu de poder faer realidá eso de que todu español tien dreitu a una convirtíuse na nuesa pesadiella del día a día. Mentar que tenemos vivido por cima de las nuesas posibilidaes supón responsabilizar a la población  de la situación actual, cuando la población malapenas protagonizóu'l papel de peón nun peligrosu xuegu en que las reglas venían dadas dende arriba, yera obligatoriu xugar y onde los peones, cumo no axedrez, yeran los primeiros en caer. Bien ye cierto que naide nun ponía un pistola na midaya al ciudadanu pa dar el pasu d'entrar nun créditu con escasas garantías de poder ser pagáu, pero tamién yeran los bancos quienes enantaban los mesmos y fomentaban la sua concesión a cualesquiera viendo neillo un negociu redondu. Nun nos engañemos, nin deixemos que nos engañen ou que quieran responsabilizanos, yera'l marcu establecidu, del que nun teníamos outra alternativa que participar, el que la política lliberal quixo pal estáu y afitóu, el marcu de la privatización, del lladriyu, de la desigualdá y de las grandes fortunas a costa del repartu de lo de todos ente unos poucos. Agora, pagando las consecuencias, los auténticos responsables viven del mesmu xeitu y nós malapenas vivimos, la cifra de paru chega a niveles inconcebibles y eillos siguen falando de los nuesos problemas cumo si daveras fueran suyos, llevando'l pelo engomináo y traxes de dousmil euros, prexubilandose a los cincuenta y seis años con mediu millón baixo'l brazu d'un trabayu pol que nun pasan dende cuantayá ou mazcarando cumo llaboral el gastu presonal p'ansí poder solventalu cono nuesu dineiru. Sólo-yes importan las perras, nada más.

Una vez un bon amigu díxome que nun ye tan fácil engañar a la xente, que puedes facelo un día, dous, hasta tres, pero non más. Aspero que sía cierto y pouco a pouco abramos los güeyos, porque lo qu'hai que cambiar ye'l sistema, non las opciones surdidas d'él, esas son todas iguales.

El 20-N you nun voto.

27/10/11

Recordanza pésica

Qué l.luenxe queda yá aquel.la alboriada
aquel.la en que'l tou cuel.lu yera tierra
de beisos ya caricias bien l.labrada.

Tan l.luenxe cumo aquel.la inxusta guerra,
dafurto fui soldáu na escuridá
ya tú la bala d'outru que m'entierra.

Fuxíamos los dous de la verdá,
ugüecha en corte achena yeras tú,
prigueiru yera you de soledá.

Sanábamos entrambos la salú
d'amor que nun foi más que vanu suenu
no qu’esnalabas de la esclavitú

Ya güei relampapixa d'odiu un truenu
que retumbiel.la, nun deixa que duerma
fayendo de la primaveira outuenu

pues fui mal l.labrador en tierra erma,
prigueiru desmañáu, triste soldáu
d'escasu méritu ente la caterma.

Pequena hestoria muerta no pasáu
qu’amuesa lo cobarde que tú yeras
ya fixo de min home atristayáu
que nunca nun volviéu a amar daveras.

26/10/11

Gripe, folk, llingua y dineiru


Una mormeira chegada de sópitu fixo que me perdiera'l postrer conciertu del V Festival Celta Internacional Reino de León, porque llamentablemente yá perdiéu'l sou nome orixinal y afitáu, en llionés. Tres trés días nos qu'Anxo Lorenzo amosaba'l sou xeitu cona gaita sacándo-ye un sonidu asemeyáu al d'una guitarra eléctrica, Rapabestas superaba esa zunia adolescente de nosotros en León no tocamos, deleitando a los asistentes cono sou dulce son y Tejedor ponía patas arriba una Plaza Mayor qu'al niciu del conciertu nun yera quien a decatase de que taba a puntu d'ascuitar al grupu folk del momentu, Hot Spoons dende Irlanda candaría seguro que brillantemente un ciclu que senciellamente nun puede/debe perdese cumo outras tantas cousas algamadas no llabor de sensibilizar a la xente pa cona nuesa identidá cultural. Uno de los aspectos que caracterizan a la sociedá llionesa ye que la espada de Damocles siempres queda escolingada sobre todo aqueillo que cheira a llionés no sou aquel más fondu, y lo daveras triste ye qu'esa espada siempres suel caer emburriada por complexos rancios y acaronxaos que paez que nunca nun deixaremos d'apollinar.

Cumo vien siendo tradición nos primeiros meses de cada llexislatura, el nuevu equipu de gobiernu que chega asoleya de contino la tremenda delda heredada de los que marchoron, delda que xenera unos inevitables recortes, torgando la normalidá a la hora desenvolver el programa políticu de los recién chegaos y que sorprendentemente suel desapaecer nos últimos meses de llexislatura, momentu en que sí qu'hai perras pa todo. En fin, la cantinela de siempres, al niciu queixas, queixas y más queixas de que nun hai dineiru y de lo muito qu'hai qu'aforrar y al cabu tres años tódolo aforráo escabíldase cono envís de convencer al electoráu de que los que gobernoron tienen feitas cousas n'abondo y por eillo deben repetir (bon exemplu d'eillo foi'l PSOE na anterior llexislatura). Cona chegada del PP tódolos amantes de lo nueso temblábamos, porque yá sabemos qu'un partidu sometidu a las decisiones de la Junta, aú s'anecia con negar el feitu diferencial llionés  pouco podría faer por él, y el tiempu acabóu dándonos la rezón: un equipu de gobiernu de caras mui mui pouco conocidas, todas eillas al aveséu de la querida Isabel Carrasco qu'a parte de tresmitir la sensación de ser la corporación que más ta tardando n'asentase, cede la estaya de cultura llionesa a un conceyal insensible dafeitu con eilla ya inespertu y carente d'arrancadeiras no terrén de la política, supongo que pa garantizar una mínima partida presupuestaria nesos temas ensin la protesta del edil y que la chama de la cultura ya identidá llionesas apuxada hasta va unos meses atrás esmoreza ensin deixar güelga.

Dalgunas de las mididas (las únicas seique) dende la toma de posesión dica güei no que cinca a cultura llionesa foron:

1. Treslladar el Festival Celta Reinu de Llión a las fiestas de San Froilán, por ser unas fechas más afayadizas pal mesmu. Ridículu, acubilar la cultura llionesa nunas fechas estrictas ye l'argumentu más paletu ya incoherente que podamos sentir yá qu'ésta debe fomentase en todu momentu, ou a lo menos esi ye'l llabor de la conceyalía que lleva esi nome, amás de que'l festival yá yera un eventu afitáu en branu y conocidu por tódolos llioneses amantes del folk, cuntaba con chenos absolutos y un clima que favorecía los mesmos. En conclusión, nun había dineiru ou a lo menos ganas de precipitase en gastalu no festival y decidioron mazcarar esi feitu conas escusas qu'empriman esti párrafu.

2. Amenorgar l'Area de Formación Tradicional, llevando las clases d'instrumentos pa la escuela de música y deixando no AFT indumentaria, baille y llingua. Ta claro que la meyor maneira de fortalecer un área de formación ye restándo-ye disciplinas, eso yá por nun falar de que tódalas disciplinas, las que quedan y las que non, requieren d'una revisión urxente y un plan d'estudios qu'anguaño nun esiste y que convierten al AFT nun centru de tiempu llibre al que la xente vei a pasar el ratu ensin esames nin asignaturas. Indumentaria tradicional, por casu, consiste en que l'alumnu escueye un traxe del país y tien que lu faer, vamos, qu'en llugar d'una clas basada no ensiñu de las características de cadún de los traxes de la nuesa indumentaria tenemos un taller de costura, maraviyosu.

3. Retirar el llionés de tódolos documentos oficiales del Ayuntamientu de Llión, por cuestión d'aforru y en pallabras del conceyal de sentido común. Esto sí que ye cuanto menos la risión, fálase de retirada de tódolos documentos oficiales cumo si tódolos documentos oficiales de l'alministración fueran en castellán y llionés, ¡oxalá fuera asina!. El llionés usábase malapenas nas actividaes de la Conceyalía de Cultura Llionesa y d'un xeitu mui sutil, sobre todo dende que Javier Chamorro garróu l'área, con un envís de que los ciudadanos que participaran de las actividades ufridas pudieran a lo menos constatar la esistencia del idioma y la súa posibilidá d'usu acullá de falar de madreñas y ganáu, siempres cono únicu afan de potencialu, de concienciar a la sociedá del sou valor cumo patrimoniu cultural impagable, de qu'hemos torgar por tódolos medios al nuesu algame la súa chegada a fas terminal y non d'imponelu cumo mueitos tentaba de faer creer, fomentando una fantasía d'una supuesta situación de peligru del castellán ou la marxinación de los sous falantes, terrible. Las declaraciones del conceyal acerca de que la nuesa llingua ye l'español y de qu'hai que potenciar l'inglés nun pudioron ser más gafas ya hipócritas, muerro de ganas por comprebar l'usu del inglés que vei faer el consistoriu y la necesidá que'l ciudadanu tien d'eillo.

4. Condicionar las clases de llingua llionesa a la demanda previa surdida d'ente los ciudadanos. Llingua llionesa ye una de las disciplinas que cunta con más alumnos y la demanda ta de mano garantizada, y esta fatada pa peneirar la realización de las actividaes igual podría hasta entendese viendo la situación de crisis económica de la casa'l conceyu si se fixera con tódala ufierta, la cuestión ye: ¿por quéi nun se fai cono restu de las disciplinas  del AFT cumo chifla, curdión, indumentaria y outras que cuntan con menor demanda? ¿por quéi las únicas torgas son puestas al llionés? Nun hai desplicación  más allá de la voluntá de buscar dalgún mediu que pueda ayudar a la retirada plena de la llingua llionesa del consistoriu  ensin qu'eillo rinche demasiáo.

En conclusión, anguaño cuntamos con un área nueva qu'axunta las anteriores estayas de cultura y cultura llionesa, na que las cousas son feitas claramente al debalu esceuto a la hora de dir pasando progresivamente a un segundu planu l'ensiñu y actividaes venceyadas al nuesu raigañu tradicional. Si estos son los primeiros pasos d'estos cuatro años nun quiero saber cúmo serán los últimos, mentanto l'agadamientu crez ente los alumnos de llionés qu'inda güei desconecen si esti añu podrán ou non siguir deprendiendo el nuesu idioma.

Al final el conceptu superficial y precipitáu que tenía del Partido Popular respeuto a la llingua y cultura llionesas nun resulta nin una cousa nin outra: un elementu muertu que nun s'axusta a las necesidaes reales de la sociedá llionesa, que xenera conflictu y que malapenas defienden cinco ou seis gañanes y radicales. Quién sabe, quiciabesmente dalgún día ente tódolos que creemos qu'al llionés inda-ye queda una última oportunidá podamos llavar esa murnia imaxe tan espayada, que yá touca.

A lo menos tuvimos festival celta.

23/10/11

Cursos de Llingua Llionesa en Llión 2011/2012

La celebración de los cursos de llingua llionesa impartidos pola Conceyalía de Cultura Llionesa del Ayuntamientu de Llión según paez dependerá esti añu de la demanda previa surdida dende los ciudadanos, poro, todu interesáu en deprender ou practicar llionés deberá chamar al Palaciu Don Gutierre (Tlfnu. 987 344 370) ou visitalu n'horariu de mañana pa informar del sou interés pola realización de l'actividá nesti cursu 2011-2012.

19/10/11

Señardá

Pechóu la revista tres lleer las entrugas feitas al ex-académicu pensando na respuesta a la terceira: la mio pallabra favorita en llingua asturiana ye señarda. Señardá, un términu del que precisamente él nunca nun entendiéu dafeitu'l sou significáu, porque sabía lo que ponía no diccionariu, pero siempres resultóu complicáo aplicalo na súa realidá. Según la primer acepción, la señardá ye'l sentimientu de tristura que se tien pola falta de daqué ou daquién, y ún de los exemplos axuntaos ye: Tengo señardá de cuando neñu. Felizmente tódala xente daveras importante a lo llargo de la súa vida siguía inda no sou rodiu y la verdá ye que nun eichaba muito en falta las cousas vividas no pasáu más llonxanu, ou a lo menos non cumo pa catalogalas dientro del conceptu literal de señardá, porque él nunca nun tuvo señardá de cuando neñu, tenía señardá de los afanes y suaños que tenía cuando nenu y que nunca nun foi nin será quién a faer realidá.

Dicen que no hay peor nostalgia que aquella que se tiene de lo que nunca ha sucedido, él tien señardá de lo qu'asperaba y nunca nun chegóu a asoceder, planes, auténticos planes, cumo diría'l cantautor llionés chamáu Fabián, planes que por unas y outras torgas güei faen d'él un home incompletu, planes pa los que pensaba que siempres habría tiempu y agora, emprimando'l camín de vuelta, pasan a la riestra de cousas nas que pensar cuando l'autocompasión esnala ensin la más mínima oportunidá de garrala. Apatía, falta de niciativa, escesu de confianza, tantos y tantos errores polos qu'anguaño mira'l presente dende'l pasáu, cono noxu y la tristura del vagamundu que camina aspáu y nun deixa d'acolumbrar l'oasis ensin acabar d'asganzalu, garráu a una soga d'esperanza que vei esfilachándose pasu a pasu.

Queda la llibertá, la posibilidá de desaniciar el camín andáu por un carreiru al aveséu de decisiones qu'él nun poudo ou soupo decidir, queda la sonce felicidá de saber qu'agora los errores y aciertos serán propios, y onque'l sou presente nun ye'l futuru suañáu no pasáu, güei'l presente tamién ye un pasáu chenu d'afanes ya ilusiones polas que lluitar cara al futuru, quién sabe, quiciabes dientro de quince años yá pueda entender y esfrutar esa definición de diccionariu, esa señardá.

6/10/11

iSad

Ayeri mesmo falaba del aparatu que revolucionóu'l mundu de la telefonía, horas depuéis finaba'l sou precursor tres una llarga lluita escontra'l cancru, deixando al mundu un interesantísimu exemplu de filosofía pa enfrentase a la vida y una güelga que yá siempres quedará no tarrén de la informática y las nuevas tecnoloxías. Descansa en paz, nun t'olvidaremos Jobs.


Apple.com: Apple tien perdido a un visionariu y creativu xeniu, y el mundu tien perdido a un maraviyosu ser humanu. Aqueillos de nosoutros que tuvimos fortuna abonda cumo pa conocer a Steve Jobs y trabayar con él, tenemos perdido a un queridu amigu y a un mentor de gran inspiración. Steve deixa tres de sí una compañía que namái él podía construir, y el sou espíritu siempres quedará cumo fundador d'Apple.

5/10/11

iPhone 4S, decepcionante nun debería ser la pallabra

La primer vez que vi un videu de lo que sería l'iPhone allá pol añu 2006 supi no intre que tábamos ante ún de los artículos que revolucionarían el panorama de las telecomunicaciones, de feitu nun yera quien a creer qu'un teléfonu pudiera dar tanto de sí mesmu ou qu'un sistema táctil pudiera furrular tan perfecta y suavemente, que tenía que se tratar simplemente del típicu anunciu qu'amuesa lo meyor d'un dispositivu qu'en realidá nun ye pa tanto y cumo n'outras tantas ocasiones... taba equivocáu. Cuando lu tuvi nas mías manos por primer vez quedéi directamente clisáu, nunca nun vi nada igual y lo realmente chamaeiro yera la comodidá cona que se podía navegar pola rede, anantando y reduciendo contenidos con sólo dous deos, por primer vez na vida taba fayendo usu d'internet cómodamente al traviés d'un telefonu, xeira realmente abegosa con outros terminales conos que fixera la preba hasta esi momentu. Poucos meses depuéis fíxime con ún y a los escasos días d'usu yá sabía que sólo podría cambiar un iPhone por outru iPhone meyor, y asina foi dica güei.

Tres dous años nos que día tras día constatéi cumo ensin esti teléfonu la mía vida yá nun sería tan cómoda, nos que me converti cuasi cuasi nun fanboy siguiendo cada keynote impartida por Apple con rixu, y nos que cumo tantos outros yera a lleer unos noventa titulares diarios chenos de rumores acerca de cúmo serían los nuevos modelos, resultame senciello entender la decepción que mueita xente sufre no que cinca a novedades cada vez que la compañía de Cupertino asoleya un nuevu modelu d'iPhone.

Si iPhone 4 ya yera un grandísimu terminal, la nueva versión S ye inda meyor, y anque las modificaciones nun rescamplen a simple vista, yá que la imaxe esterior ye identica a la previa, por dientro realmente atoupamos un bon garrapiellu de nuevas características que fairán d'iPhone 4S el meyor teléfonu del mercáu hasta la fecha.

1. Chip A5 dual-core. Una de las evoluciones más notables d'iPhone producíuse na versión 3GS que duplicaba la velocidá del sou predecesor, el cualu, a la que-ye dabas un pouco más de cera de la normal podía chegar a resultar realmente frustrante pola súa llentitú. iPhone 3GS y iPhone 4 pola súa parte yeran dous terminales que ya furrulaban rápida y fluídamente ensín cuelgues momentáneos, pueis bien, la versión 4S duplica la velocidá del sou predecesor, característica de la que podemos decatanos especialmente no tratamientu de gráficos de xuegos. Nun ye que you xuegue mueito pero... las aplicaciones abriránse tamién inda más rápidu.

2. Cámara d'oito megapíxeles con lente de mayor apertura. Las imaxes que s'amosoron na keynote d'ayeri deixan en ridículu a más d'una camara compacta de las vendidas anguaño. Por fin iPhone tien una cámara fotográfica realmente bona, dalgo que you siempres eichéi en falta, y eso que la del 4 ya yera decente.

3. Grabación de videu Full-HD. Tardóu en chegar pero chegóu y amás vien con estabilizador d'imaxe, menos movimientu nas nuesas pelis llariegas.

4. Mayor velocidá de tresmisión de datos. Concretamente'l doblu que no sou predecesor, iPhone 4S cambia aína d'una antena a outra pa garantizar la calidá d'unvíu y recepción de chamadas. Dizse qu'iPhone 4 cuntaba con problemas de cobertura, you nunca nun tuvi nin un solu mensax d'avisu de chamadas perdidas pero asina paez qu'esi problema queda definitivamente aviáu.

A parte d'iOS 5, iCloud y outras cousinas de software de las que yá teníamos conocencia va meses, los residente n'España paez que nun esfrutaremos, a lo menos por agora, de SIRI, el flamante asistente vía voz d'iPhone que llamentablemente namái tará disponible n'inglés, francés y alemán. Si realmente funciona cumo pudimos ver na keynote ou no sou videu promocional... tamos ante una ferramienta que cambiará dafeitu l'usu de los smartphones. Senciellamente di-ye a tu iPhone "¿Quéi tiempu vei faer mañana en Llión?" y el terminal dará la respuesta automáticamente, pidi un restaurante na túa ciudá y el teléfonu buscarálu por ti, recibe un sms, pidi al iPhone que lu llea, lleerálu y si recitas la respuesta unviarála por ti, ye asina de fácil. Prestosu asgaya ¿verdá?.

Si en tantos foros, blogs y publicaciones podemos lleer acerca d'una supuesta decepción por parte de la xente que taba a la espectación... ye senciellamente pola inesistencia d'un cambiu esterior no terminal. You quixera mayor pantalla, menor pesu, radio fm y nun tener que mercar un telar que val 100 € pa poder faer un usu correctu del gps, polo demás... encántame. Si Apple nun decidíu cambiar l'aspectu del teléfonu ye senciellamente por que según ta véndese cumo churros, cuando las ventas baixen sutilmente yá tendrán tiempu de faer ún nuevu.

Nun nos engañemos, iPhone 4S ye un gran teléfonu no fondu y na superficie, agora namái touca pensar quéi trampa puedo faer pa que Movistar me dea ún de baldre...

19/9/11

Regresu a la fe

Cuando más rápido pasaba'l tiempu ensin qu'asocediera nada,
cuando nun paraba de chover pero'l prau nun repullecía,
cuando los trenes marchaban al veme chegar a la estación,
cuando un beisu sólo podía empeorar las cousas,
cuando más miedu tenía a desplicame,
cuando afuxendo tropezaba y daba gracias pola paz del fríu suelu,
cuando you nun quería ser you,
cuando'l la seruenda que semeyaba una calda primaveira foi amburada pol branu,
cuando la segunda oportunidá que todu home merez yera la terceira,
cuando agromóu una flor esmorecida,
cuando'l presente yera un futuru que nunca nun chegaría,
cuando por fin entendí lo de me canso de ser hombre,
cuando Pablo Neruda escosóu los sous versos,
cuando todo podría ser peor,
cuando las pantasmas nun creían en min,
cuando sólo podía entrugame ¿cuándo?,
cuando sabía que nunca chegarías...

Cheguesti.


16/9/11

Migración

Gracias a la picia que nos fixo google a mueitos usuarios de quitar la vinculación ente cuntas gmail y google apps, feitu pol que yá un mesmu usuariu nun puede tener dúas direcciones de corréu venceyadas, tuvi que migrar tódol blog a ún nuevu, poro, tódalas entradas asoleyadas dica güei tienen la mesma fecha onque yá nun tendréi que sufrir l'engulema de camudar de cunta cada pouco pa unviar correos, publicar no blog ou eichar un güeyu a las mías feeds.

Problema iguáu. Thanks google ;)

MUSAC


Nunca nun entendí l'arte contemporaneu, nun sei si pola pasión que siempres despertóu en min el clasicismu ou por nun tener a nadie que s'amoliestara en desplicámelu, sicasí, bien de veces tuvi la ocasión de visitar museos d'esti xeitu ensin que nengún d'eillos llograra causame gran impresión. Güei acheguéime al MUSAC, pámeque por tercer vez, y yá que las dúas visitas anteriores fonon llibres y nun m'enteréi de nada, esta vuelta tentéi de dir n'horariu de visita guiada (de baldre) y... ¡qué gran diferencia!



Las dúas esposiciones que pudi visitar, dambas collectivas, fonon I was a male Ivyonne de Carlo y El Grito. Na primeira d'eillas espéyase una visión crítica de la sociedá americana y el propiu arte, n'onde son parodiaos aspectos cumo'l conceptualismu, el cine d'autor, amosando la cara más aburrida d'esti, ou la propiedá privada y los fondos raigaños capitalistas de los Estaos Unidos al traviés de, por casu, una proxección rodada nun Ikea n'horariu llaboral y ensin permisu del establecimientu na qu'una familia abronca a sou fiyu por robar y pretende desplica-ye lo que ye la propiedá privada y los sous beneficios, chegando'l rapaz a una conclusión un tanto divertida ya inesperada. No casu d'El Grito, la esposición xira alredor de la esencia de la famosa obra pictórica del mesmu nome, amosando con pinturas, instalaciones y proxecciones los diferentes niveles de tresmisión emocional que puede ufrir un glayidu en sí mesmu. Rescamplan las fotografías de Teresa Margolles acerca de cines mexicanos abandonaos aú l'artista alluga nos sous lletreiros frases que xóvenes deixoron escritas antias de suicidase, ou los cuadros espresionistas nos que surde una gran carga emotiva de la que'l visitante puede decatase d'un solu güelpe de vista. Dambas esposiciones interesantes daveras.

Definitivamente los llioneses tenemos mueita suerte de cuntar con un espaciu tan importante y atractivu pa chumbanos no arte contemporaneu na nuesa ciuda y amás gratuitamente, y dizlo dalguién que nunca nun valoróu con xusticia esti tarrén. El MUSAC abelluga obras de sorprendentes artistas, grandes medios p'amosalas y meyores profesionales pa que desmañaos cumo you sían a entendelas (un 10 pa la nuesa guía), una esperiencia en definitiva arriquecedora que tódolos llioneses deberían esfrutar dacuandu, y sorrayo lo de todos porque... na visita guiada de güei yéramos dúas presonas. Triste.

11:11


El pasáu 9 de Xunu, no Palaciu Don Gutierre de Llión, asistí por motivos de trabayu a la presentación del llibru Un día de Primavera, del escritor llionés afincáu en Segovia Raúl Rodríguez. L'autor desplicaba na súa intervención que la obra trata sobre una vivencia presonal de carácter espiritual que tuvo llugar trenta años atrás y de la que nunca nun falóu con naide dica güei: una fuerte lluz clisóulu cuando tenía unos dieciséis años y dende entós la súa vida y percepción del entornu cambioron pa siempres. Francamente, ascuitéi la hestoria con una mistura d'aburrimientu y escepticismu hasta que l'escritor amentóu un pequeñu detalle que me resultóu tremendamente chamadeiru: el feitu en cuestión no que ta basada la obra y las consecuencias del mesmu asocedioron en fechas que xiraban alredior del númaru 11, númaru qu'endolca un gran misticismu y que ye  referente a la era d'acuariu na qu'entraremos no añu 2012. Ensin afondar mueito más no tema, Raúl Rodríguez fixo tamién un chamamientu a los asistentes pa que dende esi momentu, prestaran atención a lo qu'asocedía al sou alredor porque de xuru que'l númaru 11 taría presente d'una maneira mueito más frecuente de lo normal, xustificando esa presencia a modu de mensaxes y chamadas d'atención de carácter quiciabesmente interdimensional.

Llevo unos seis meses, tres antias que la fecha de la presentación del llibru, viendo de maneira practicamente enfermiza en reloxes, monitores, páxinas web, etc. esto: 11:11

Test

Prebando l'aplicación de Blogger pa iPhone... Hello world!

Prólogu

Cuando espertóu de sópitu alendóu fondo y tres decatase d'aú taba sonriéu, las primeras rayadas surdidas d'ente las nubes tres la truena calecían el sou rostru y el camín abríase énte él. Sabía que yá nun tendría que mirar atrás, sabía que yera llibre...
Related Posts Plugin for WordPress, Blogger...