29/11/12

Nota de prensa de las asociaciones Faceira, Furmientu, El Teixu, La Caleya y Documentación y Estudio de El Rebollar

El Conseyu d’Europa refierta a la Xunta de Castiella y Llión la falta de protección del llionés
Las asociaciones en defensa de la llingua llionesa Faceira, Furmientu, El Teixu, La Caleya y Documentación y Estudio de El Rebollar denuncian que la Xunta de Castiella y Llión mintíu al Conseyu d’Europa sobre la protección del llionés. Amás, el gobiernu autonómicu nun atendíu al Comité d’Expertos designáu p’analizar el cumplimientu de la Carta Europea de las Llinguas Rexonales ou Minoritarias n’España
El Conseyu d’Europa acaba de facer públicu’l tercer informe periódicu pa España sobre l’aplicación de la Carta Europea de las Llinguas Rexonales ou Minoritarias, tratáu internacional ratificáu por España no 2001 que pretende la protección de las llinguas rexonales ou minoritarias europeas. Dende la reforma del Estatutu d’Autonomía de Castiella y Llión del 2007, na que’l llionés consiguíu l’estatus de llingua protexida de conformidá col sou artículu 5.2, el dichu tratáu ampara tamién esti idioma y, por ello, el Conseyu d’Europa tamién valoróu nesti informe’l nível de cumplimientu de la Carta pol gobiernu autonómicu de Castiella y Llión en relación col llionés.
Na información que díu no 2010 la Comunidá de Castiella y Llión al Conseyu d’Europa, el gobiernu autonómicu mintíu dellas veces al afirmar que se taban faciendo actividades pa la protección y fomentu del llionés, cousa que nun ye cierta cumo se puede ver nel informe del Conseyu d’Europa. El gobiernu de la Xunta señalóu amás que las dichas actuaciones taban siendo desenvueltas dende l’alministración autonómica pola Dirección Xeneral de Promoción y Instituciones Culturales, al traviés del Institutu Castellanu y Llionés de la Llingua. Sí qu’así, la dicha Dirección Xeneral nunca s’oucupóu de promocionar el llionés, función que nin siquiera ta ente las suas competencias, y l’Institutu Castellanu y Llionés de la Llingua ye una simple fundación privada, non un organismu alministrativu, dedicada expresamente a la promoción del español. Dase la circunstancia de que la Xunta de Castiella y Llión nunca desenvolvíu nengún programa pal fomentu del llionés, nin destinóu nunca partidas presupuestarias que dean cumplimientu al mandatu estatutariu de protección y regulamentación del llionés, a diferiencia de lo que pasa colas llinguas gallega y vasca en Castiella y Llión.
No 2011 la Secretaría pa la Carta Europea de las Llinguas Rexonales ou Minoritarias del Conseyu d’Europa pidíu información adicional a la Xunta de Castiella y Llión y interesóuse amás sobre cuál yera l’organismu alministrativu que s’oucupaba na dicha comunidá de la protección del llionés, sin recibir respuesta nenguna. Outramiente, convocóu una representación de l’alministración autonómica a una regunión col Comité d’Expertos encargáu d’analizar l’aplicación d’esti tratáu internacional a las llinguas rexonales ou minoritarias d’España, regunión que taba prevista pal 7 de santamarina del 2011 na sé de la Comisión y del Parlamentu de la Unión Europea en Madril y a la que nun acudíu nengún representante de l’Alministración de Castiella y Llión, que foi asina la única comunidá de las convocadas que nun asistíu.
Nel informe dichu, el Conseyu d’Europa recomienda a l’Alministración de Castiella y Llión actuaciones decididas pa protexer el llionés, y solicita a esta comunidá autónoma que dea noticia expresa de las mididas adoptadas nel informe periódicu próximu. Amás, fai recordar a la Xunta de Castiella y Llión que’l reconecimientu simple del llionés nel Estatutu d’Autonomía nun ye abondo pa la sua promoción y protección, y que fain falta mididas concretas y prácticas pa facilitar y promover l’usu del llionés na vida pública. El lliones -sigue l’informe- nun se deprende no sistema educativu nin lu utiliza l’Alministración, polo que’l Comité d’Expertos que lu subscribe anima a las autoridades a tomar mididas pa ufrir el llionés cumo una parte integral del plan d’estudios, polo menos cumo una asignatura, y con carácter preferente naquellas zonas onde se fala.
L’informe conclúi que’l llionés conforma una unidá col asturianu y col mirandés, y que, anque esta llingua ta reconecida nel Estatutu de Castiella y Llión de 2007, las autoridades autonómicas nun adoptanon hasta’l momentu la regulamentación oportuna pa la sua protección y promoción, nin desenvolvienon mididas prácticas relevantes pa protexer esta llingua.
Nesti vínculu puede vese enteru (n’inglés) el tercer informe periódicu pa España sobre l’aplicación de la Carta Europea de las Llinguas Rexonales ou Minoritarias del Conseyu d’Europa: Los parágrafos que falan del llionés son los que siguen: 63, 123, 124, 142, 143, 175, 176, 206, 212, 225, 228; y la conclusión y propuesta de recomendación referida al llionés identifícase cola lletra Q.
Subscriben esta nota las asociaciones en defensa de la llingua llionesa que siguen: Faceira (Llión), Furmientu (Zamora), El Teixu (Asturias, Llión, Zamora y Bregancia), La Caleya (Llión), y Documentación y Estudio de El Rebollar (Salamanca)

26/11/12

La nueite que ganoron tódolos que perdieron

Nas nueites de resultaos electorales hai pouco que me preste más que ver las noticias, debates, etc. de los medios del réxime. Güei cenéi viendo El Gato al Agua d'Intereconomía, foi un exerciciu de vanidá. Encántame ascuitar las mentiras que sueltan cumo si nada y detectalas aína, pa min ye un xuegu que fai que me sienta llibre. El mensaxe repetidu durgante toda la emisión foi'l mesmu que'l de cuasimente tódolos medios estatales: La innecesaria convocatoria d'elecciones y l'apocalípticu fracasu de Mas acompañáu de cansinas frases feitas: que si Mas ye menos, que si la fola soberanista afogóu al president, bla, bla, bla.


¿Yeran daveras necesarias estas elecciones? You cuido que sí y voi intentar desplicar el porqué procurando deixar de llau la simpatía que tengo por Artur Mas, porque si bien nun me presta'l sou partidu y nun lu votaría... sí que me presta la sua imaxe cumo políticu, el sou xeitu, el sou comportamientu calmu y dialogante polo menos n'apariencia. Pa entendenos, que you soi de los que lu valoraría bien nesas encuestas acerca de lo que s'opina de los candidatos al marxe'l partidu al que representan.

En dalguna entrada anterior mentéi las dificultaes que tien el ciudadanu español mediu pa estremar ente nacionalismu ya independentismu, dous términos que xeneralmente van xuntos pero que nun son lo mesmo. CiU ye una coalición nacionalista pero que siempres refugóu l'independentismu dientro de los sous postulaos y programas políticos, de feitu nestas últimas elecciones la sua propaganda tovía falaba de la defensa del dreitu a decidir, de la importancia voz del pueblu, pero la palabra independencia naide nun yera quien a atopala por nengún llau. Sicasí, la situación esta vez yera bien diferente, dende l'once de Setiembre en qu'un venti por cientu de los catalanes salieron a la cai nuna única manifestación pidiendo la independencia pa Cataluña, CiU siguíu ensin falar abiertamente d'ella pero decidíu garrar el touru polos cuernos ya intentar sacar alantre una consulta popular acerca de si'l pueblu catalán quier ou non un estáu propiu pa sí mesmu, acompañandola d'un proyectu de país dientro d'Europa por parte de la propia coalición y con una clara voluntá d'avanzar p'hacia esi estáu. La cuestión entós yera, si CiU cuntaba yá con mayoría absoluta y había más fuerzas dientro del Parlament que sofitarían esi referendum, ¿cual sería l'aquel de convocar unas nuevas elecciones cuando tovía restan dous años pal cabu la llexislatura? Ye eiquí n'onde cobra importancia esa diferencia ente nacionalismu ya independentismu, ente'l votu coyuntural y el compromisu de dar un pasu p'hacia dalgo que nun tendría vuelta atrás. CiU en todu momentu defendíeu que pa que se diera esa consulta yera necesaria una ampla mayoría que la respaldara, en definitiva, Mas nun quería celebrar esi referendum ensin saber cual yera'l porcentaxe del electoráu que lu encontaría agora que sí apostaría pol futuru de Cataluña al marxe d'España, agora que sí apostaría pola independencia onque por unas cousas ou outras nun acabara de presta-ye l'usu d'esi términu. Mas básicamente quería saber cuantos de los sous votantes yeran independentistas amás de nacionalistas. Anguaño y polas políticas del PP fálase muito de la democracia participativa, de que si un partidu vai facer dalgo que nun está no sou programa electoral ou que lu contradiz debería consultar al pueblu, pueis bien, el President quixo saber cuantos de los sous votantes estarían a favor d'esa consulta pol estáu propiu que nun se planteaba dous años atrás cuando l'oxetivu yera'l pactu fiscal y non outras cousas. You si fuera votante de CiU sentiríame arguyosu del sentidu de la democracia amosáu nesta ocasión.

Güei, llunes de resaca electoral, la coalición nacionalista quedan con cincuenta escaños, doce menos qu'en 2010, y los medios falan de fracasu. Que si Cataluña refuga'l separatismu, que si los catalanes aman España, que si Mas debe dimitir. Supongo que ye una llectura muito más cómoda pa los qu'están a favor de la defensa del espíritu nacional qu'encalcar el feitu de que la suma de tódolos escaños de las formaciones políticas que nun apuestan pola independencia da un resultáu inferior al númaru d'escaños arrecadaos por CiU, y que tódolos partidos que sí apuestan abiertamente por ella anantoron notablemente la sua representación.

Nun hai cegueira más ridícula que la selectiva.

5/11/12

Esti sábadu, n'El Bierzu...


29/10/12

Una mañana pa la esperanza

Me duele España dicía Miguel de Unamuno. A min xeneralmente España nunca nun me duele gota, pero esta espresión podría valir d'exemplu aproximáu sobre cúmo soi a sentime respeuto al tema que quiero tratar. No mieu casu falar sobre la posible supresión de las xuntas vecinales llionesas puede resultar mui cómodo, ye cumo falar y querer protestar enérxicamente por dalgo no que sabes que puedes facer ou contribuir más bien no xusto. Nací y crecí en Llión ciudá y nun poudi vivir en primer presona la importancia y necesidá d'estas entidaes tan fundamentales cumo niciu de la complexa identidá llionesa, pero al igual qu'Unamuno you tamién puedo dicir que me duele León, y onque esta lluita pueda nun afectame directamente por ser propia del mediu rural al que nun pertenezo, sí que quiero ser parte d'eilla pueis supón outra agresión al mieu pueblu, al mieu país, a Llión. 

Con un mayor afán d'información que de contribución asistí el pasáu sábadu a la mañana a las Jornadas sobre Juntas Vecinales entamadas pola asociación Faceira que publicitéi na anterior entrada d'esti blog. De las dúas conferencias que conformaban la xornada, una dende una perspectiva hestorica y la outra dende un puntu de vista llegal, saquéi las conclusiones que desplico darréu y que quixera compartir conos poucos ou muitos internautas que visitan esti blog, porque fundamentalmente las meyores ferramientas que tienen aqueillos que quieren desaniciar lo nueso son la desinformación y posible apatía de los afectaos por esta afrenta. 

Las xuntas vecinales, heredeiras de los conceyos ou sistema poblacional propiu llionés, son las entidaes encargadas de xestionar y alministrar nos nuesos pueblos el patrimoniu comunal, el de todos en xeneral y nadie en perticular, asina cumo las competencias derivadas del mesmu: tierras, allumáu, llimpieza, servicios funerarios, etc. Tanto en forma presidencial cumo de conceyu abiertu, suponen la voz más pura y directa del pueblu pa tomar decisiones sobre'l propiu pueblu, somos nosoutros falando y decidiendo sobre lo nueso y el sou rendimientu, n'onde los beneficios ou perxuicios nun afectan a una sola presona nin xurden de las decisiones d'una sola presona, todos falamos y decidimos sobre lo qu'afecta a todos y ye de todos, y la consecuencia será responsabilidá de todos. L'actual gobiernu, amparándose nesta crisis global que paez que xustifica cualesquiera ataque a los que más la sufren, determinóu la reforma de la Llei de Bases de Réxime Local na que se procederá a la supresión de toda entidá local menor que nun sía a adaptase a unos determinaos estándares de tresparencia y furrulamientu. Si bien ye cierto que los nuesos conceyos pecoron dica güei d'una determinada falta d'esa mentada tresparencia alministrativa y burocrática, propiciada seique por esa tovía güei inevitable separación del mundu rural y el progresu, tamién ye cierto qu'esi supuestu aforru con que se quier xustificar el sou desaniciu escuende en realidá l'afán d'asumir esi patrimoniu y competencias populares conos brazos abiertos y asina cuntar cun outru calce pa sufragar la deuda de las alministraciones que serían quienes garraran la sua xestión, ayuntamientos básicamente. En realidá la ensundia del procesu ye bien senciella, arrebatar una vuelta más los bienes al pueblu pa que pase a manos de la nuesa cotrosa clas política y con esos bienes pagar la deuda que la nefasta xestión de los propios políticos xeneróu. Más de lo mesmo, quien menos tien y quien menos culpa tien ye quien paga los errores de los d'arriba.

José Serrano, el primer ponente, pouxo cumo exemplu l'interés que tienen anguaño los países d'oriente no  mercáu de l'alfalfa. Si los ayuntamientos asumen las tierras de cultivu que güei pertenecen llegalmente al pueblu, nun dubiarán seique n'arrendalas a esas empresas de fuera pa qu'acambiu d'una determinada cantidá  sían ellos los que las esploten y non los moradores de los nuesos pueblos, convirtiéndo-yes en foriatos na sua propia tierra.  La empresa de fuera gana, l'alministración local paga deuda vendiendo los bienes comunales arrebataos a los ciudadanos, los ciudadanos pierden y puntu. Tan fácil d'entender cumo terrorífico.

La mesa redonda con representantes de dalgunas xuntas vecinales espeyóu en terminos xenerales l'abondosa desinformación y la confusión en muitos pueblos que nun toman parte en torgar esti procesu bien por galbana ou porque los políticos de la zona garantizan que serán ellos los que farán dalgo, gracioso, porque todos, unos y outros sacarán proveitu d'esta situación, unos polo desplicáo nas ringleiras anteriores, outros por tener una escusa pa facer oposición, pero nengún d'eillos por tener daveras interés n'iguar esto. Deben ser los propios ciudadanos de los nuesos pueblos los que tomen parte y sían a decatase de la gravedá del asuntu y del espoliu que supón. Ún de los representantes dixo que pa él las xuntas vecinales tamién exercen cumo respuesta popular al poder establecidu, cumo una de las escasas maneiras de facer directa y llegalmente frente dende los habitantes a las decisiones políticas que nun obedecen a los intereses de la población. Nun-ye falta rezón y nos tiempos que cuerren namás por aquello yá paga la pena movese escontra la sua desapaición, con ellas morrería un cachu más de democracia y güei yá queda mui mui pouca.

De trenta años p'acá, los ataques recibidos pol pueblu llionés xeneroron más farona que ganas de lluita, confio en que la xente que'l pasáu sábadu amosóu esas ganas de lluita pueda contaxar al restu la voluntá de polo menos facer dalgo tan simple cumo abrir los güeyos, falta fai.

19/10/12

Jornada sobre las Juntas Vecinales

Dúas horas pa conciencianos de la gravedá que supondría'l desaniciu de las nuesas entidaes locales menores,  heredeiras de los conceyos y eix de la nuesa identidá más fundamental cumo pueblu. La sua pérdida ye la pérdida de nosoutros mesmos, you asistiréi.

25/9/12

Los dous nacionalismos: el malu y el que nun esiste

Muitas son las cousas ditas, ascuitadas y lleídas dende la manifestación pola independencia de Cataluña celebrada na pasada Diada na ciudá condal, esti post namás quier ser una curtia reflexión presonal más referida a un sector determináu de los que falan de la polémica qu'a la polémica en sí mesma. Pa entamar diréi que soi abiertamente nacionalista, nunca nun lo neguéi y por ello nunca nun aceptéi de bona gana l'usu d'esi terminu con un aquel despectivu, cumo si l'usu de la palabra nacionalismu siempres entisnara de dalgo negativo la conversación n'onde fuera usada. Muitas son las definiciones que podemos atopar sobre esti términu, pero pa nun estender demasiáo esti post, aforrar un poucu de tiempu de llectura y garantizar unos mínimos de visión neutral, resumiréi diciendo qu'en xeneral las prencipales características d'esti -ismu son: el fundamentu de la soberanía nacional, según el cualu la nación ye la única base llexítima pal estáu; el prencipiu de nacionalidá pol que toda nación debería tener un estáu propiu n'onde las llindes deberían coincidir conas del espaciu xeográficu au mora la nación; y finalmente la defensa, caltenimientu y emponderamientu de las características y valores culturales y hestóricos que dotarían a la nación de la sua identidá. La definición de la palabra nación ou de las características conas que debe cuntar un pueblu pa selo darían n'abondo pa outru post y nesti casu nun falaréi d'ello, you presonalmente cuido que l'unicu requisitu necesariu ye la voluntá ciudadana de querer ou nun querer ser, pero vamos al granu.

Tres l'éxitu de la manifestación en cuestión y la tebia y pouco clara declaración d'intenciones d'Artur Mas n'onde s'aldovina más bien un pasu en falsu qu'outra cousa, saltoron tódalas alarmas nesos medios que menos dubias tienen a la hora d'usar de baldre'l términu  nacionalista (Razón, Gaceta, ABC)  pa etiquetar a todu aquel malintencionáu que pueda acaronxar el sou conceptu d'esa España cumo unidá territorial, cultural y hestórica indivisible, idea espayada davezu nas suas portadas hasta la fartura (ou la risión, especialmente en redes sociales) y que resulta enforma asemeyada a los puntos fundamentales d'esi nacionalismu definidu ringleiras atrás y qu'ellos tanto amientan cumo prencipal mal ou acabación del estáu. En resume: uso p'atacate, insultate, criminalizate ou desprestixate'l términu que meyor me define.

Dicía Josep-Lluís Carod-Rovira años atrás nesi programa d'entrugas y respuestas n'onde s'enfoscaba con un espectador por chama-ye José Luís, que pa él el peor nacionalismu de todos yera'l nacionalismu español, esi del que nunca nun se fala. Estói d'alcuerdu, muitas foron las desafortunadas rezones (empeñu mediáticu, terrorismu, etc) que ficieron que n'España'l conceptu de nacionalismu se venceyara únicamente y siempres con un envís negativu al feitu de qu'un determináu territoriu naguara por romper cono presente estáu, puntu d'entamu de dúas consecuencias qu'inda vivimos güei: el tracamundiu de dous términos que xeneralmente van xuntos pero nun son lo mesmo (nacionalismu ya independentismu) y el surdimientu d'un calláu pactu que mazcara a lo que debería chamase públicamente nacionalismu español cumo lo correcto, lo normal, lo lóxico.

Cuando Carod-Rovira afirmaba que'l nacionalismu español yera'l más peligrosu de todos, quiero entender que se refería a que supón básicamente una ideoloxía que niega sistemáticamente la realidá plurinacional d'España, fundamentándose n'argumentos históricos referentes a un territoriu creáu y defendidu dende arriba más por reis, dictadores y caciques que pola voluntá d'unión de los sous ciudadanos, n'onde l'unicu noyu de xuntanza foi una llingua impuesta que non sólo nun ye la propia de la mayoría de territorios qu'esti nacionalismu quier abarcar sinon qu'amás supouxo en gran midida'l desaniciu de las que sí lo yeran. Esta evidencia, resulta tan desconecida cumo imposible  d'aceptar por una sociedá que felizmente vei perdiendo pouco a pouco la desaxerada credibilidá pola prensa escrita qu'hasta ayeri tenía, que sigue repostiando énte la entruga sobre esa supuesta cultura común española con touros, xoldra, dieta mediterránea, llingua castellana ou carácter llatinu, ou que nas últimas elecciones xenerales escoyíu por mayoría absoluta a un partidu políticu nacionalista español pa que gobernara durgante cuatro años.

El nacionalismu español, al igual que Soria, esiste, y quixera ver el día en que'l ciudadanu d'esti estáu antias de chamar a naide nacionalista pa insultalu, fuera quién a entrugase si él lo ye más, prestaríame pola vida qu'asina fuera.

Salú,


22/8/12

Llionés y gallegu ou qué mal repartidu está'l mundu dende'l primer mes de Xineiru

Dúas selmanas atrás, volviendo d'una visitina por tierras de Valdión cona mia familia, mia tía, emigrada n'Alicante dende cuantayá, entrugábame acerca del llionesismu políticu no que militéi hasta va bien pouco, la sua rezón de ser y oxetivos, yá que nun yera quien a entender esi noxu xeneral p'hacia tódolo que cheira a Valladolid, aquello de que los llioneses querían independizase de Castiella ou lo de que tenemos un idioma propiu, en fin, todas esas cousas. Una vuelta más, cumo yá ficiera outras tantas con tanta xente, despliquéi-ye que l'actual comunidá autónoma de Castiella y Llión foi un inventu creáu por rezones d'estáu que nun obedecían a lo que mentaba la constitución del Estáu español, que yera la única autonomía formada por dúas nacionalidaes desemeyadas y que pa más INRI, nella tentábase de fomentar un sentimientu d'unidá cultural ya identidá inesistentes gastando nesi sen miles de euros cada añu que pagamos todos. Ella entendiéu a la perfección los mieus argumentos pero costába-ye y muito creer que tres las acciones llevadas a cabu dende la Junta de Castiella y Llión pudiera daveras haber intenciones escuras ou un envís de tapecer la cultura ya identidá llionesas, pa ella abultaba inconcebible qu'una alministración pública tuviera nengún afán en desaniciar la cultura del territoriu que rixe. Nun la culpo, efectivamente dalgo asina debería ser inconcebible.

Cuando garréi interés pol llionés diez años atrás (diez años son muitu tiempu na llinia de vida d'una llingua minorizada), amolábame cumo poucas cousas el tratamientu d'inesistencia recibidu pol llionés dende la Junta. La nuesa llingua nun esistía nel anterior estatutu d'autonomía, nun yera mentada en nenguna ringleira del mesmu nin recibía la más mínima aportación de las arcas públicas, el gallegu sicasí, deprendríase nas escuelas d'El Bierciu ou l'alta Senabria, tenía partida presupuestaria y yera reconecidu cumo llingua propia d'esas comarcas. Presonalmente nunca nun vi nesa situación de desigualdá nengún oxetivu acullá d'afondar na negación y desaniciu de la cultura llionesa, el típicu divide y vencerás usáu nesti casu pa emponderar esi gallegu faláu na fasteira más occidental de Llión y asina tildar de gallega esa zona, amosando una supuestamente desinteresada sensibilidá pa con esi feitu y afitando llazos ente las dúas comunidaes, la gallega y la castellano-llionesa, adorable. Esta situación llevóu a situaciones tan chuscas cumo la optatividá del gallegu n'escuelas de zonas bercianas fuera del sou dominiu llingüísticu, y onque'l tema daría pa falar llargo, nun quiero entrar demasiáo nél,  nun me paez mal l'ensiñu del gallegu nos territorios del País Llionés au sea faláu inda qu'esi gallegu tenga pouco que ver cono que se puede sentir na TVG y estea chenu de llionesismos.

Aprobada la última reforma nel estatutu de Castiella y Llión n'Avientu de 2007 chegamos a un fitu hestóricu, el reconecimientu del leonés nel artículu 5.2, póngolo en cursiva porque nun s'esclaria si ye una llingua, un dialectu ou quei. El testu diz literalmente que "El leonés será objeto de protección específica por parte de las instituciones por su particular valor dentro del patrimonio lingüístico de la Comunidad. Su protección, uso y promoción serán objeto de regulación". La situación del gallegu nun varía. Pueis bien, cinco años pasoron yá dende entós y las mididas llevadas a cabu pola Junta pa esa protección, uso y promoción foron cero, cero en cinco años. Nun hai regulación, normalización, normativización, fondos, cursos, promoción, actuación en toponimia, nada, nun hai nada, nada trés cinco años.

Asociaciones cumo Faceira llevan tiempu dando la murga a la Junta, pidiendo desplicaciones énte tal inoperancia, énte la vergoñosa situación de qu'una alministración autonómica incumpla'l sou propiu estatutu, recibiendo respuestas tan ridículas dende la conseyería de cultura cumo qu'en Llión sí que se faen cursos nel Ayuntamientu y que son mididas cumo esas las que xustifican el testu del estatutu. Gracioso, cuando precisamente namás chegar al Ayuntamientu de Llión el Partido Popular, formación política que gobierna igualmente na Junta, llevóu a cabu cumo primer actuación en materia de cultura desaniciar toda güelga de llingua llionesa esistente nel consistoriu, situación yá detallada n'entradas anteriores. Una de dúas, ou hai una falta de coordinación, información y directrices a siguir ente'l PP llionés y l'autonómicu monstruosa ou la mentira rescampla.

Los años siguen pasando, la nuesa llingua sigue agonizando y esi artículu 5.2 sigue siendo papel moyáu, outramiente, del tratamientu del gallegu por parte de l'alministración autonómica podemos ller noticias cumo esta: La Junta da 600.000 euros al año al gallego y cero al leonés.

¿Hasta cuándo?.

9/7/12

II Xornadas de Patrimoniu Llingüísticu

Esqueiz tódolo que deprendisti, entama por suañar

Los pasaos días 6 y 7 d'esti mes de Xuliu asistí con muitas ganas a las II Xornadas de Patrimoniu Llingüísticu entamadas pola Asociación El Teixu, formada por xente d'Asturies, Llión, Zamora y Miranda de l Douro pal estudiu y defensa de la llingua llionesa. Siguí cada puntu del programa con rixu, alcontréi dalgunas presonas conas que yá tenía falao pero nun conecía inda en presona y conecí a outras  que, cumo you, muerren d'amor por esti idioma y ven nél un oxetivu en sí mesmu y non un calce ou un arma p'algamar outras cousas que pouco ou nada deberían tener que ver cono llionés.

El día más interesante baixo'l mieu puntu de vista foi'l primeiru. A las 19,00 h. y tres una breve inauguración, el botánicu Juan Andrés Oria de Rueda Salgueiro presentaba'l sou llibru Llogas Carbayesas. Güei mesmo rematéi esta fugaz pero interesantísima obra de poesía y puedo dicir que los versos qu'abelluga tresmiten la mesma sensibilidá y tresparencia que las palabras dedicadas pol autor a la llingua na sua intervención. La gran emoción amosada por Juan Andrés cuasimente mazcaraba los terribles exemplos qu'utilizóu pa que'l públicu se decatara de la humillación qu'a lo llargo de la sua vida vienen sufriendo los falantes patrimoniales de llionés nas zonas zamoranas aú inda pervive, humillación surdida de los sous educadores ou de la propia vergoña de los falantes, cogüelmada de continuas correcciones énte la más mínima palabra autóctona que se-ye pueda escapar a dalguién ou invitaciones a la burlla y usu de remotes escontra'l falante. Dalgún cotrosu exemplu: habla así porque tiene Alzheimer (y nun lu tien); la llamamos la portuguesa, es de Portugal y por eso habla así (y nun ye de Portugal); Habla mal, adelante, reíros de él. Sicasí l'autor tamién mentóu qu'esa vergoña vei perdiéndose ente las xeneraciones más nuevas y que'l llabor qu'asociaciones cumo Furmientu vienen realizando dende cuantayá siguen dando dalgo d'esperanza al futuru del idioma en tierras zamoranas.

El puntu fuerte de la tarde chegóu cona presentación de Xurdir, guía gramatical de llionés editada pola xoven pero enforma trabayadora asociación Faceira. Trátase d'un pequeñu pero axeitáu manual pa todos aqueillos que quieran achegase a esti prestosu y llamentablemente agonizante mundu de la llingua llionesa. Basáu prencipalmente nas variantes del berciano-senabres y pal.luezu pero afayadizu pa cualesquiera de las demás, aborda en dieciocho capítulos y con bayurosos exemplos cadún de los aspectos fundamentales del idioma. Un gran trabayu que sirve de puntu de partida pa outras publicaciones yá en preparación cumo son un llibru de mitoloxía popular del Reinu de Llión, un diccionariu y un manual prácticu de llionés. El futuru preséntase mui esperanzador pal idioma cono llabor de Faceira.

Las xornadas candóronse'l segundu día cona presentación del llibru Onde la palabra pousa, una riesta de testos en lliones occidental esbillaos polos filólogos María Cueto y Xulio Viejo onde atopamos escritos d'esta variedá arrecadaos dende'l sieglo dieciocho nas tierras d'Asturias, Llión, Zamora y Miranda. Una obra indispensable que nun debería faltar na estantería del bon amante de la nuesa lliteratura. Darréu, Xulio Viejo impartíeu una conferencia sobre'l llionés na Edá Media y pa cabu la música de Fran Allegre con gaita, pandeiru y bigulín pouxo'l puntu final al eventu.

Tres estos dous días, puedo dicir abiertamente que m'abulta mui pero que mui prestosu poder comprebar cumo hai tanta xente seria, comprometida ya interesada en facer un trabayu granible y ensin dobles afanes pol llionés, el que crea que l'idioma morriéu equivócase, tovía hai un gran frente pa torgar esi final, tovía hai futuru pa la nuesa llingua.

Norabona a los organizadores, asina sí.

1/5/12

The hunger games, aqueillo que podría asperar no futuru

Desconecía las novelas, la triloxía, y entréi no cine cona desgana del aburridu y asperando outru rellatu moceril d'amor, calamidaes y barata ciencia-ficción. Qué equivocáu estaba.

The hunger games (los xuegos de la fame) representa un futuru non mui llonxanu en qu'un llugar chamáu Capitolio, esplota, asobervia y somete a deillas comunidaes humanas d'alredor separtadas por distritos au la miseria y el trabayu p'abastercer al focu de poder central caracterizan el día a día. Una amatada rebelión no pasáu protagonizada pola periferia cono envís de desaniciar esta situación, fizo que dende entós  y añalmente un mozu y una moza d'ente 13 y 18 años pertenecientes a cada distrito deban acudir por sortéu y ensin posibilidá de negase a los chamaos xuegos de la fame, una especie de tornéu a muerte n'onde todos deben lluitar escontra todos por sobrevivir, pudiendo quedar numás ún d'eillos con vida, siendo esti ganador. L'aquel d'esti tornéu, amañáu en Capitolio y retresmitidu en tódolos distritos, nun ye outru que llembrar la guerra que xeneróu'l pasáu llevantamientu y amosar esplícitamente las suas consecuencias, sufrimientu y muerte, p'asina caltener apagáu l'afán de llibertá y controlar a los distritos.

Un mundu de fonda desigualdá social n'onde las presonas nun importan y el control del poder sí, y n'onde'l miedu a una situación inda peor ye la ferramienta afayadiza pa xustificar una vida indigna. Una metáfora d'aqueillo p'hacia lo que caminamos, del presente en definitiva, oxalá nunca nun pase d'eso.

Déixovos el trailer en castellán, paga la pena sacar entrada, palabra.

27/3/12

Sangre na braña, de Roberto González-Quevedo


Tengo'l placer de conecer al escritor palaciegu Roberto González-Quevedo y la sua obra dende va deillos años, home comprometidu col idioma, cona tierra y con todu aquel que sienta por éstas el mesmu amor que la propia traxeutoria de Roberto refrenda. La sua lliteratura, siempres filvanada n'asturllionés occidental, supouxo pa min ún de los emburriones más importantes pa chumbame nesti océanu de palabra, raigañu, tradición, lluita y alcordanza qu'escuende la llingua llionesa. Namoráu de las suas lletras, marchéi a escape a la gueta de la postrer publicación asoleyada baixo la sua autoría: Sangre na braña. La prosa que tengo lleída de Roberto, prencipalmente ensayística, está cogüelmada d'una reflexón fonda enforma que de contino endolca cada palabra, cada idea. La rutina rural de los nuesos antepasaos, los valores y vezos d'antaño, son conectaos axeitadamente pol escritor col presente más urbanu y los sous diarios dilemas, achegándonos a las nuesas raíces, garrándolas cumo exemplu y amosando la escasa diferencia qu'estrema al ser humano d'entós y de güei na sua esencia más fundamental.

Sangre na braña entra dientro del xéneru de novela negra, una estaya que m'apasiona  y de la que nun tenía nada lleído en llionés. Agatha Christie y Mary Higgins Clark encántanme, por eillo salí arguyosu de la llibrería col primer exemplar vendidu en Llión d'esta obra baixo'l brazu y una necesidá incontenible d'entamar a lleela con rixu. Debo confesar que la portada, que siempre debe ser curiosina en todu llibru, resúltame mui desafortunada, y que, cuando rematéi'l primer capítulu, sentíme decepcionáu n'abondo más que nada porque entamar un rellatu d'esti xéneru con un osu falando en primer presona nun me paez la meyor manera d'envizcar al llector, pero cumo nun podía ser d'outru xeitu, en pasando las páxinas el panorama cambia dafeitu.

Un escenariu tan pasmosu cumo'l xabaz asesinatu d'una familia que mora nuna braña del Altu Sil ensin güelga dala que lo xustifique, precede a la intensa investigación que llevará a Dalgliesh-Muxivén, titular del casu, al corazón d'Europa hasta dar con dalgún carreiru que pueda esclariar tan macabru socesu, avaliéndose de l'ayuda d'importantes collacios de profesión nos sous respectivos llugares d'orixe. Nesti escuru viaxe volveremos a tastiar la ineludible vocación ensayística de Roberto, que nun dubiará n'acutar en cada escenariu un espaciu pa la reflexón y la filosofía d'unos personaxes y sobremanera d'un protagonista en que l'autor nun deixa d'espeyase con claridá.

Un llibru sorprendente, chenu d'un gran suspense que se vai conxugando a la perfección col gran amor de Roberto por Palacios del Sil y la sua llingua. De xuru que vos engayolará tanto cumo lo fizo conmigo. Trés días tardéi en lleelu.

Salú,

9/3/12

RTVCyL, la tintorería de Carrasco

Meses atrás dalguién, nun me llembro de quién, alertaba en twitter d'una maniobra d'Isabel Carrasco pa llimpiar la sua imaxe al traviés d'un programa de TVCyL que rellataría las 24 horas d'un día na sua vida. Nun soupi más del tema hasta qu'ayeri outru usariu de twitter, @marioLlion concretamente, publicaba la lligazón al mesmu en Youtube.

Pouco puede dicise d'Eilla que cualesquiera llionés un poucu enteráu de l'actualidá política nun conoza yá: el cientu de cargos polos que lleva pa la fardela una cantidá escandalosa, las dietas indebidamente cobradas, los kilometraxes, bla bla bla. Na mia esperiencia presonal tódolos los afiliaos al PP conos que touvi ou tengo rellación dalguna, que nun son poucos, siempres faloron de Carrasco del mesmu xeitu: una muyer con idénticu poder que facilidá pa perder las formas en situaciones tensas ou adversas, el perfil d'una cacique de primer categoría en definitiva. Abulta sorprendente que si la gran mayoría de los miembros del sou partidu nun quieren que sía la presidenta del mesmu siga siéndolo, pero la sua posición ta mui curiosamente afitada: l'arimu que recibe Isabel Carrasco vien dau en menor importancia polos cuatro chupalandrinas y paniaguaos de Llión ciudá pa los que prima más una vida acomodada que'l compromisu pa conas suas convicciones ideolóxicas, y principalmente polos numarosos alcaldes populares de la provincia de Llión que respuenden a las chamadas de la presidenta a consecuencia de los favores y l'atención que los sous conceyos reciben dende la diputación provincial, ou meyor desplicáo: Nun me votes y quedas ensin polideportivu.

Dalgunos foron los proxeutos de valientes que tentoron de plantar cara a la reina pero faltoron arrancadeiras cuando había que dar un pasu alantre daveras definitivu. Majo, Silván, todos eillos querían ser abanderaos d'un cambiu real na dinámica del PP llionés pero finalmente arrenuncioron a eillo pa garantizar una posición curiosa ensin espolines que pudieran torgar la sua carreira política, una carreira eternamente al aveséu d'esa mesma muyer cona que querían acabar ensin afayar un calce efectivu pa facelo. Y sí, tamién houbo dalgún friki que plantegóu una alternativa, más que nada porque nun tenía nada que perder, el problema d'esta xente con más corazón que tiesta ye que nun son a decatase de que resulta más eficaz pa esbarrumbar una muria d'esa categoría qu'un únicu candidatu gane un congresu con un 60% de los votos y las dubias qu'aqueillo xeneraría a que lo gane escontra outru candidatu surdidu de la nada por un 80% - 20% acabando más fortalecidu de lo qu'emprimóu. Esa podría ser baixo'l mieu puntu de vista la maneira d'aflaquecer a Carrasco, pero precisa de la paciencia cona que yá nun cuntan unos afiliaos que ven pasar los años y sicasí la presona que más noxu-yes da sigue moviendo los filos.

Nun quiero rematar esta entrada ensin una pequeña recordaza p'aqueillos qu'amparaos nel anonimatu  de la rede entamoron blogs y foros pa cuntar tódolos trapos sucios d'Eilla pero finalmente viendo peligrar el sou xornal y el dinero con el que pagar el colegio de sus hijas acaboron siendo los sous principales defensores en primeira llinia de batalla. Ay Yiyo Yiyo, si la xente supiera...

El reportaxe... cotrosu, empondera las reformas na diputación tan criticadas nas que s'escabildoron miles d'euros de los llioneses, fai omisión de los detalles realmente importantes nos escándalos de los qu'esta muyer ye protagonista y trata despectiva y tendenciosamente al diariu dixital más afanáu n'asoleyar cadún de los escuros asuntos de Carrasco. Seique siempres acabo falando de los medios de comunicación, pero paezme murnio enforma qu'esos que deberían informar a la ciudadanía tean en realidá al serviciu de los más dañibles pa con eilla, cumo ya dixera en twitter, aspero que polo menos los artífices d'esta indignante peliculina cobraran bien.

Salú,

15/2/12

24 versos pa San Valentín

Lluz sonce de primaveira
espierta amodo estas manos
pa qu'apañen cada instante
qu'entrambos d'amor creamos,
pa qu'axeiten cada beisu,
cada meimu, cada abrazu,
dibuxando ilusionadas
un futuru ensin mal trazu
au furacanes y truenas
nun mueyen la nuesa chama
pero amollezan el barru
que pueda torgar las ganas
d'avanzar p'hacia outru fitu,
d'escomenzar outra vuelta,
de prosiguir escribiendo
esta hestoria a pluma suelta.
Y en cada fría alborada
qu'espierte abrazáu a ti,
morrer d'amor, d'allegría,
glayar con fuerza, vivir,
tastiar la llouca fervencia
que bulle pola pasión
con que das cuerda a esta vida,
dueña del mieu corazón.

12/2/12

SSS (Stupid Standard Spaniard)


Nesti intre, mentanto escribo estas ringleiras ye bien probable qu'un paráu de llarga duración estea esbardiando en dalgún bar ou na sua propia casa sobre la gravedá del ataque surdidu de los medios de comunicación  franceses a la dignidá de los deportistas españoles y los sous llogros. Doping, Contador, Nadal, clembuterol, guiñoles, gabachos... güei nun se fala d'outra cousa. Amentando esto, llémbrome de cuando meses atrás, viendo'l programa Informe Robinson sobre'l camín que llevóu a la selección española a algamar la merecida copa'l mundu 2010, documental n'onde amecían imaxes de los partidos con entrevistas a los xugadores, ascuitéi al porteiru Pepe Reina dicir lo que vien darréu: ¿Todo un país unido? Es que yo creo que eso solamente lo hace el fútbol. Nun sabe tódala rezón que tien, resulta sorprendente comprebar cumo a pesar de los tiempos que cuerren la xente pueda sentise más ofendida y entamar un espolín bien curiosu porque se cuestione la llimpieza de los llogros deportivos españoles que pol feitu de que los sous dreitos cumo ciudadanos y trabayadores sían amenorgaos a pouco y a pouco hasta tornar a los primeiros años de la democracia.

Cuido que la única desplicación qu'hai ye qu'eichamos tanto de menos los tiempos de la bonanza económica de 2004-2008 y tenemos tanta fe en que se pueda volver a eillos que pa consiguilo estamos dispuestos a soportar lo que faiga falta, xubida d'impuestos, despidu más baratu y mayor númaru de casos en que sía procedente, ERE's con muitas menos torgas por parte de l'alministración, disminución de la igualdá d'oportunidaes fomentando los contratos formativos a xovenes que marxinan inda más al paráu de llarga duración de más de trenta años, minijobs... en fin, todas esas cousas que tenemos delantre y nun queremos ver porque confiamos en que sirvan pa reactivar la economía y acabar col paru cumo diz Mariano. El gobiernu español xustifica estas mididas argumentando que si los empresarios tienen mayores facilidaes pa despidir al emplegáu tendrán tamién menos dubias a la hora de contratalu, pero nel fondu todos sabemos ou deberíamos saber qu'el problema nun ye que l'empresariu tenga dubias a la hora de contratar al emplegáu, si precisa d'él contratarálu, el problema ye que lo que necesita l'empresariu agora mesmo ye únicamente despidilu. Más despidos y más impuestos nunca nun podrán estorgar el consumu ente la población y reactivar la economía, dous y dous son cuatro.

Ayeri mesmo dalguién entrugábame ¿pero de verdá nun confías na pallabra del gobiernu?, gracioso. Dientro un par d'años, cuando la situación estea igual ou mui probablemente peor si siguimos pol camín d'aviar las cousas del presente con iguas del pasáu, la xente dirá ensin muita falta de rezón que son los políticos que nos tienen engañaos y xuegan con nós. Efectivamente los políticos son los únicos responsables de las propias decisiones qu'eillos tomen, pero güei tenemos la suficiente información por varios calces cumo pa decatanos de lo qu'están a facer y para-yes los pías a tiempu, sicasí... nun respondemos, miramos pa outru llau y bramamos pola inxusticia de lo de Contador. Debería danos vergoña, ye mui cruel na situación actual dicir que tenemos lo que merecemos pero cuasimente ye verdá.

Pa esi español que mira con pasividá cumo la clas política esfarrapia y escabilda los sous bienes pero protesta pola inxusticia deportiva, pola llei del albuertu y porque esto ye España y eiquí tien que se falar español... va tiempu qu'alcontréi las siglas SSS (Stupid Standard Spaniard), llamentablemente España está chena d'eillos.

Salú,

1/1/12

Añu nuevu, día 1

Diz la voz popular que cuando Dieus piecha una puerta abre una ventana y pesia qu'anguaño cuando miras alredor dan ganas de pechar tanto puertas cumo ventanas, no fondu siempres queda una bona parva de cousas polas que siguir lluitando.

El 2011 foi un añu diferente, una llinde, una fronteira más na mia vida de las tantas que quedarán pa siempres esturadas na memoria y que contribuíu a escribir unas cuántas páxinas más nesti alma con cada vez menos fueyas en brancu. Supouxo romper definitivamente con un estilu de vida más fácil y enredador, romper con una pantasía que llogróu anubrir los oxetivos que persiguí durgante muitos años, torgar el mieu avance hacia eillos y faer de min un escravu en xaula de prata, la cuestión ye que la vida ye curtia enforma cumo p'apigazar no que sabemos ye irreal ou mirar pa outru llau mentanto escapan las oportunidaes de faer  realidá los suaños y prencipios que sí que nos convertirán en presonas arguyosas de lo feito, por suerte el camín qu'había que desandar nun yera tan llargu nin pindiu cumo semeyaba y el carreiru correctu onque tampouco nun ye fácil, resulta muito más gratificante.

Pero tamién ganéi amor, ganéi arimu, una mano qu'agarrar cuando paez que ya nun queda nada y un emburrión cuando pierdo las arrancadeiras pa dar un pasu más. A eilla... gracias, en realidá naide nun fixo nunca tanto por min en tan poucu tiempu, aspero que los años me dean la oportunidá de compensar tanta paciencia y empeñu.

Esta ye la mañana de los propósitos, you numás tengo tres y con un pouco de ganas pueden llevase a cabu, renovar el mieu compromisu firme conas mias convicciones, cona xente a la que-ye importo y cumo non, cona llingua llionesa, eilla sigue siendo la gran pasión de la mia vida y mentanto siga habiendo la más remota posibilidá de faer dalgo por eilla, onque sía escribir cuatro ringleiras pa que las poucas presonas que me llean puedan decatase de qu'esiste, agoniza y ye mui necesaria la sua revitalización... you siguiréi neillo.

Feliz 2012, a todos, a los qu'estuvioron, a los que siguen estando, y a los qu'estarán, dicen que será outru añu difícil, pero confío daveras en que podamos superalu y hasta esfrutalu.

Verémonos,
Related Posts Plugin for WordPress, Blogger...