18/10/18

V Cursu d'Iniciación a la Llengua y Cultura Tradicional Llionesas



Calca eiquí p'acceder al programa detalláu.


L’asociación Faceira, cumpriendo cono sou compromisu cona defensa y promoción de la llengua y cultura llionesas, y ante l’exitu de los cursos llevaos a cabu los pasaos años, organiza’l sou quintu cursu d’iniciación al nuesu idioma y cultura tradicional en modu presencial que vai tener llugar na ciudá de Llión, concretamente nas aulas de la consultoría de formación Skala, asitiada na calle Jorge de Montemayor, 6.

El cursu tendrá una duración total de 50 horas lectivas que s’impartirán cada vienres entre las 17,00 y las 19,00 horas, dende’l 9 de noviembre del presente añu hasta’l 17 de mayu de 2019.

Las crases de llengua contarán cumo base de trabayu cona guía gramatical de llionés Xurdir y el manual prácticu d’iniciación Falar con Xeitu, editaos entrambos los dous pola nuesa asociación, amás d’outros materiales didácticos que serán entregaos a cada alumnu dientro’l preciu de matrícula. Xunto al aspectu concretamente lingüísticu, al que s’adicarán 30 horas, el cursu abordará a lo llargo d’outras 20 horas cuestiones cumo la literatura, historia, toponimia, mitoloxía, arquitectura tradicional, música, antruidu y mázcaras, encuestación, procesu de recuperación moderna del llionés y comportamientos y costumes na sociedá llionesa; aspectos au la nuesa llengua siempre xugóu un papel fundamental, acutandose dúas horas a cadagunu d’estos aspectos y contando nellos con un profesoráu con fonda competencia y experiencia en cada eiru.

Tódolos interesaos en matriculase pueden facelo presencialmente en Skala Formación, calle Jorge de Montemayor, 6, ou na web www.skalastudios.es. El prazu de matrícula remata’l próximu 6 de noviembre y el preciu de la mesma ye d’un pagu únicu de 40€. Las prazas son limitadas. Pa más información contactar na dirección de corréu asociacionfaceira@gmail.com.

Llugar: Skala Formación, calle Jorge de Montemayor, 6, Llión.
Horas lectivas: 50.
Crases: Los vienres de 17,00 a 19,00 horas del 9 de noviembre al 17 de mayu.
Preciu: 40 € (pagu únicu, incluye material didácticu).
Prazu d’inscripción: Hasta’l próximu 6 de noviembre.
Materias, horas y profesores:
  • Iniciación a la llengua llionesa – 30 horas (Xairu López).
  • Historia de la literatura en llengua llionesa – 2 horas. (Nicolás Bartolomé Pérez).
  • Mitoloxía llionesa – 2 horas (Ricardo Escobar).
  • Toponimia y mediu natural de Llión – 2 horas (Alejandro Díez).
  • Antruidu y mázcara na cultura llionesa – 2 horas (Iván Martínez Lobo).
  • ¿Qué ye la cultura llionesa? Características, costumes y comportamientos no substractu cultural cisastur – 2 horas (Xuan Getino).
  • Historia de la recuperación moderna del llionés, la perspectiva d’un escritor – 2 horas (Xosepe Vega).
  • Historia del Reinu de Llión – 2 horas (Ricardo Chao).
  • Arquitectura tradicional llionesa – 2 horas   (Iván Martínez Lobo).
  • Música y tradición oral llionesas – 2 horas (David Álvarez Cárcamo).
  • Encuestación – 2 horas (Iván Martínez Lobo).

Más información: asociacionfaceira@gmail.com

Nun hai comentarios.

Publica agora'l tou comentariu:

Related Posts Plugin for WordPress, Blogger...