Señardá

Pechóu la revista tres lleer las entrugas feitas al ex-académicu pensando na respuesta a la terceira: la mio pallabra favorita en llingua asturiana ye señarda. Señardá, un términu del que precisamente él nunca nun entendiéu dafeitu'l sou significáu, porque sabía lo que ponía no diccionariu, pero siempres resultóu complicáo aplicalo na súa realidá. Según la primer acepción, la señardá ye'l sentimientu de tristura que se tien pola falta de daqué ou daquién, y ún de los exemplos axuntaos ye: Tengo señardá de cuando neñu. Felizmente tódala xente daveras importante a lo llargo de la súa vida siguía inda no sou rodiu y la verdá ye que nun eichaba muito en falta las cousas vividas no pasáu más llonxanu, ou a lo menos non cumo pa catalogalas dientro del conceptu literal de señardá, porque él nunca nun tuvo señardá de cuando neñu, tenía señardá de los afanes y suaños que tenía cuando nenu y que nunca nun foi nin será quién a faer realidá.

Dicen que no hay peor nostalgia que aquella que se tiene de lo que nunca ha sucedido, él tien señardá de lo qu'asperaba y nunca nun chegóu a asoceder, planes, auténticos planes, cumo diría'l cantautor llionés chamáu Fabián, planes que por unas y outras torgas güei faen d'él un home incompletu, planes pa los que pensaba que siempres habría tiempu y agora, emprimando'l camín de vuelta, pasan a la riestra de cousas nas que pensar cuando l'autocompasión esnala ensin la más mínima oportunidá de garrala. Apatía, falta de niciativa, escesu de confianza, tantos y tantos errores polos qu'anguaño mira'l presente dende'l pasáu, cono noxu y la tristura del vagamundu que camina aspáu y nun deixa d'acolumbrar l'oasis ensin acabar d'asganzalu, garráu a una soga d'esperanza que vei esfilachándose pasu a pasu.

Queda la llibertá, la posibilidá de desaniciar el camín andáu por un carreiru al aveséu de decisiones qu'él nun poudo ou soupo decidir, queda la sonce felicidá de saber qu'agora los errores y aciertos serán propios, y onque'l sou presente nun ye'l futuru suañáu no pasáu, güei'l presente tamién ye un pasáu chenu d'afanes ya ilusiones polas que lluitar cara al futuru, quién sabe, quiciabes dientro de quince años yá pueda entender y esfrutar esa definición de diccionariu, esa señardá.