29/11/11

Prostitución periodística y llingua llionesa

Na mañana d'ayeri, dous años depuéis, los ciudadanos de Llión espertábamos col nuesu idioma autóctonu cumo protagonista de la portada del Diario de León. Nesta ocasión y tres superase nazismos y llionpedias, el decanu de la prensa llionesa garra d'esmenu un sorprendente interés pola n'apariencia elevada inversión que na anterior llexislatura l'equipu de gobiernu realizara a la hora d'impartir cursos de llingua p'adultos y escolines.

Quienquiera que me conoza medianamente, sabe de mano la falta de confianza que tengo en tódala prensa española y el mieu escepticismu a la hora de lleer titulares sensacionalistas y grandes escándalos que de sópitu cogüelman rotativos y mazcaran cuasi siempres outros afanes, sía quiciabes porque you mesmu los sufrí y en primer presona tastiéi las medias verdaes qu'el periodismu puede chegar a asoleyar cuando los intereses perticulares tienen más pesu que la pura información, pero en fin, vamos a la ensundia del asuntu.

La noticia, roblada por Miguel Ángel Zamora y basada nunos datos que de xuru filtrara'l gabinete de prensa del Partido Popular del Ayuntamientu de Llión col envís de xustificar la esclusiva ausencia del llionés dientro de la oferta de cultura tradicional del consistoriu y ansí afrontar las queixas por parte del alumnáu, informa tendenciosamente de las retribuciones recibidas pola figura del coordinador de cultura tradicional y de los cuatro monitores qu'afalaban los cursos, cantidaes que na sua totalidá suman en cuatro años según fuentes del periódicu  417000 €, cifra nada despreciable y que mui probablemente escandalizaría a cualesquiera presona pa la que la llingua llionesa nun suponga un elementu de prioridá nos difíciles tiempos que cuerren... ou tal vez non tanto si afondamos un pouco na cuestión:

El coordinador de cultura tradicional, con una soldada idéntica a la que cobran tódolos coordinadores de las diferentes áreas del ayuntamientu, tien la función cumo'l sou propiu nome indica de planificar, estructurar y supervisar la realización de tódalas actividaes venceyadas a cultura tradicional nas que'l llionés nun supón nin una décima parte, feitu pol que nun entiendo, acullá d'un interés d'anantar la cifra un pouco a la desesperada, la presencia de la sua figura nesta noticia, pero a parte d'eillo, si garramos las retribuciones de los cuatro monitores, de los cualos tres tan adscritos dende cuantayá a la conceyalía de bientar social y nun foron contrataos específicamente pa impartir llionés sinon pa sofitu escolar, podemos comprebar fayendo la correspondiente división cumo'l sueldu malapenas supón unos 1000 € mensuales. Vamos, que sólo un monitor foi contratáu esclusivamente pa dar esas clases y el sou salariu suponían 20000 € brutos añales, los cualos, multiplicaos por cuatro años de llexislatura dan en realidá 80000 €, cantidá mui pero que mui llonxana de los 417000 € con que l'Ayuntamientu de Llión tenta de llavar la manos na abegosa xeira d'acabar con dalgo tan afitáu na conceyalía de cultura llionesa cumo yera la nuesa llingua. Outramiente, cumo bien indica la noticia, yá sólo quedan dous monitores dedicaos a impartir las clases de cultura llionesa en colexos, y encalco lo de cultura porque yá decidioron l'añu pasáu de maneira dafeitu unillateral deprender únicamente cultura a los rapaces y retirar llingua.

N'entradas anteriores yá faléi del evidente oxetivu del nuevu equipu de gobiernu de desaniciar la llingua llionesa del ayuntamientu, agora, garantizando inversiones en publicidá y la soscripción del consistoriu al Diario de León, utilizan al mesmu con comunicaos prerredactaos vestidos de noticias pa xustificar cumo nesti casu la súa política dictada dende la ciudá del Pisuerga. En realidá nun sei quéi ye peor, si la falta d'honestidá del PP desenvolviendo dafurto las suas mididas acordias a los sous oxetivos reales ou que'l periódicu que nun va muito publicitaba y falaba d'actividaes rellacionadas cona nuesa llingua, cultura y feitu diferencial, tenga que poner la sua llinia editorial a los pías de los que gobiernan p'afrontar la crisis. Güei, publicaban outra nueva na qu'amentaban que mui probablemente las clases serían esternalizadas ya impartidas por una asociación, lo que supón que con suerte, de volver, el llionés volverá tarde y en segundu
planu, pola mor de la escasa esperiencia y carácter del actual conceyal de cultura llionesa, l'avulense Juan Pablo García Valadés p'ansí amatar ou tentar d'amatar la polémica, y cuido que será de la mano de metodoloxías más al serviciu d'outras cousas que de la recuperación d'un idioma al que-ye quedarán al pasu que vamos unos venti años de vida, tornando a un error cometidu no pasáu que pouco a pouco diba aviándose no Palaciu Don Gutierre.

Vivimos tiempos oscuros, eso es innegable. Harry Potter y las reliquias de la muerte, de J. K. Rowling.

Salú,

Nun hai comentarios.

Publica agora'l tou comentariu:

Related Posts Plugin for WordPress, Blogger...