22/8/12

Llionés y gallegu ou qué mal repartidu está'l mundu dende'l primer mes de Xineiru

Dúas selmanas atrás, volviendo d'una visitina por tierras de Valdión cona mia familia, mia tía, emigrada n'Alicante dende cuantayá, entrugábame acerca del llionesismu políticu no que militéi hasta va bien pouco, la sua rezón de ser y oxetivos, yá que nun yera quien a entender esi noxu xeneral p'hacia tódolo que cheira a Valladolid, aquello de que los llioneses querían independizase de Castiella ou lo de que tenemos un idioma propiu, en fin, todas esas cousas. Una vuelta más, cumo yá ficiera outras tantas con tanta xente, despliquéi-ye que l'actual comunidá autónoma de Castiella y Llión foi un inventu creáu por rezones d'estáu que nun obedecían a lo que mentaba la constitución del Estáu español, que yera la única autonomía formada por dúas nacionalidaes desemeyadas y que pa más INRI, nella tentábase de fomentar un sentimientu d'unidá cultural ya identidá inesistentes gastando nesi sen miles de euros cada añu que pagamos todos. Ella entendiéu a la perfección los mieus argumentos pero costába-ye y muito creer que tres las acciones llevadas a cabu dende la Junta de Castiella y Llión pudiera daveras haber intenciones escuras ou un envís de tapecer la cultura ya identidá llionesas, pa ella abultaba inconcebible qu'una alministración pública tuviera nengún afán en desaniciar la cultura del territoriu que rixe. Nun la culpo, efectivamente dalgo asina debería ser inconcebible.

Cuando garréi interés pol llionés diez años atrás (diez años son muitu tiempu na llinia de vida d'una llingua minorizada), amolábame cumo poucas cousas el tratamientu d'inesistencia recibidu pol llionés dende la Junta. La nuesa llingua nun esistía nel anterior estatutu d'autonomía, nun yera mentada en nenguna ringleira del mesmu nin recibía la más mínima aportación de las arcas públicas, el gallegu sicasí, deprendríase nas escuelas d'El Bierciu ou l'alta Senabria, tenía partida presupuestaria y yera reconecidu cumo llingua propia d'esas comarcas. Presonalmente nunca nun vi nesa situación de desigualdá nengún oxetivu acullá d'afondar na negación y desaniciu de la cultura llionesa, el típicu divide y vencerás usáu nesti casu pa emponderar esi gallegu faláu na fasteira más occidental de Llión y asina tildar de gallega esa zona, amosando una supuestamente desinteresada sensibilidá pa con esi feitu y afitando llazos ente las dúas comunidaes, la gallega y la castellano-llionesa, adorable. Esta situación llevóu a situaciones tan chuscas cumo la optatividá del gallegu n'escuelas de zonas bercianas fuera del sou dominiu llingüísticu, y onque'l tema daría pa falar llargo, nun quiero entrar demasiáo nél,  nun me paez mal l'ensiñu del gallegu nos territorios del País Llionés au sea faláu inda qu'esi gallegu tenga pouco que ver cono que se puede sentir na TVG y estea chenu de llionesismos.

Aprobada la última reforma nel estatutu de Castiella y Llión n'Avientu de 2007 chegamos a un fitu hestóricu, el reconecimientu del leonés nel artículu 5.2, póngolo en cursiva porque nun s'esclaria si ye una llingua, un dialectu ou quei. El testu diz literalmente que "El leonés será objeto de protección específica por parte de las instituciones por su particular valor dentro del patrimonio lingüístico de la Comunidad. Su protección, uso y promoción serán objeto de regulación". La situación del gallegu nun varía. Pueis bien, cinco años pasoron yá dende entós y las mididas llevadas a cabu pola Junta pa esa protección, uso y promoción foron cero, cero en cinco años. Nun hai regulación, normalización, normativización, fondos, cursos, promoción, actuación en toponimia, nada, nun hai nada, nada trés cinco años.

Asociaciones cumo Faceira llevan tiempu dando la murga a la Junta, pidiendo desplicaciones énte tal inoperancia, énte la vergoñosa situación de qu'una alministración autonómica incumpla'l sou propiu estatutu, recibiendo respuestas tan ridículas dende la conseyería de cultura cumo qu'en Llión sí que se faen cursos nel Ayuntamientu y que son mididas cumo esas las que xustifican el testu del estatutu. Gracioso, cuando precisamente namás chegar al Ayuntamientu de Llión el Partido Popular, formación política que gobierna igualmente na Junta, llevóu a cabu cumo primer actuación en materia de cultura desaniciar toda güelga de llingua llionesa esistente nel consistoriu, situación yá detallada n'entradas anteriores. Una de dúas, ou hai una falta de coordinación, información y directrices a siguir ente'l PP llionés y l'autonómicu monstruosa ou la mentira rescampla.

Los años siguen pasando, la nuesa llingua sigue agonizando y esi artículu 5.2 sigue siendo papel moyáu, outramiente, del tratamientu del gallegu por parte de l'alministración autonómica podemos ller noticias cumo esta: La Junta da 600.000 euros al año al gallego y cero al leonés.

¿Hasta cuándo?.

Nun hai comentarios.

Publica agora'l tou comentariu:

Related Posts Plugin for WordPress, Blogger...